झापा। झापामा कोभिडविरुद्धको १५ हजार मात्रा खोप आएको छ। नयाँ खोप तालिकासहित जिल्लामा कोभिडविरुद्धको १५ हजार मात्रा फाइजर खोप आएको स्वास्थ्य कार्यालयका प्रमुख रमेश बाराकोटीले जानकारी दिए।

Advertisement 1

“झापाका पालिकाहरुसँग समन्वय गरेर खोप वितरण गर्छौं,” उनले भने, “अब नयाँ तालिकाअनुसार खोप कार्यक्रम अघि बढ्छ।” नयाँ खोप तालिकाअनुसार ५ प्रकारका जनसङ्ख्यालाई लक्षित गरिएको छ। रोगप्रतिरोध क्षमता कम भएका ५ वर्षभन्दा माथिका बालबालिका, वयस्क र ज्येष्ठ नागरिकलाई प्राथमिकतामा राखिएको प्रमुख बाराकोटीले बताए।

यसैगरी, स्वास्थ्यकर्मी र बिरामीको प्रत्यक्ष सम्पर्कमा आउने व्यक्ति, गर्भवती महिला, १२ वर्ष वा सोभन्दा माथि उमेरका अन्य व्यक्ति र ५ वर्षदेखि ११ वर्षसम्मका अन्य बालबालिकालाई खोपको प्राथमिकतामा राखिएको छ। जिल्लामा ८ जना कोभिड सङ्क्रमित फेला परेका छन्। तीमध्ये ५ जना झापाका छन्भने मोरङ, इलाम र दोलखाका १/१ जना रहेको बाराकोटीले जानकारी दिए।

Advertisement 2

झापामा कोभिडको सङ्क्रमण देखिन थालेपछि मेचीनगर नगरपालिकास्थित काँकरभिट्टा नाकामा शङ्कास्पद मानिसको कोभिड परीक्षण हुन थालेको छ। “काँकरभिट्टा नाकामा कोभिड परीक्षणका लागि ३ जना खटिएका छन्,” उनले भने, “जटिल प्रकृतिका बिरामीलाई कुन अस्पतालमा राख्ने भन्ने अन्योल छ।”