काठमाडौं। सरकारले आगामी आर्थिक वर्ष २०८१/८२का लागि १८ खर्ब ६० अर्ब ३० करोड रुपैयाँ बराबरको बजेट सार्वजनिक गरेको छ। अर्थमन्त्री वर्षमान पुनले मंगलबार आगामी आर्थिक वर्षको बजेट सार्वजिनक गर्दै उक्त जानकारी गराएका हुन्।

Advertisement 1

उनका अनुसार आगामी आर्थिक वर्षका लागि चालूगत बजेटतर्फ ११ खर्ब ४० अर्ब ६६ करोड रुपैयाँ विनियोज गरिएको छ। त्यस्तै पुँजीगत बजेटतर्फ ३ खर्ब ५२ अर्ब ३५ करोड रुपैयाँ विनियोजन गरिएको छ। त्यस्तै वित्तीय व्यवस्थातर्फ ३ खर्ब ६७ अर्ब १८ करोड रुपैयाँ विनियोजन गरिएको अर्थमन्त्री पुनले जानकारी गराए। आगामी वर्षका लागि विनियोजन गरिएको कुल बजेट चालू आर्थिक वर्षको बजेटको तुलनामा ६.२ प्रतिशत बढी हो।

आगामी आर्थिक वर्षमा सरकारले १२ खर्ब ६० अर्ब ३० करोड रुपैयाँ राजस्व उठाउने लक्ष्य राखेको छ। त्यस्तै वैदेशिक अनुदानबाट ५२ अर्ब ३३ करोड रुपैयाँ उपलब्ध हुने अर्थ मन्त्री पुनले बताए। आगामी आर्थिक वर्षमा सरकारले २ खर्ब १७ अर्ब ६७ करोड रुपैयाँ वैदेशिक ऋण लिने योजन बनाएको छ। त्यस्तै ३ खर्ब ३० अर्ब रुपैयाँ आन्तरिक ऋणबाट उठाउने योजना सरकारको छ।