ब्यापारमा सहजीकरण नभएको भन्दै ब्यापारीहरुले चीनबाट नेपाल ल्याईएका समाग्रीहरुको भन्सार जाँच पास नगर्दा तीन दिनदेखि रसुवा भन्सार कार्यालयमा भन्सार असुली ठप्प भएको छ । चीनबाट हुने मालवस्तु आयातमा भन्सारले आफूखुसी मूल्यांकन गरेको भन्दै व्यापारीले यसको दीर्घकालीन समाधान नभएसम्म रसुवा नाकाबाट कारोबार नगर्ने घोषणा गरेका हुन् ।

Advertisement 1

भन्सारको व्यवहारले केही महिनायता निकै ठूलो आर्थिक नोक्सानी बेहोरे पनि आफूहरूको सुनुवाइ कतै नभएको व्यापारीहरूको गुनासो छ । व्यापारी भन्छन्, ‘भन्सार कर्मचारीलाई जे लाग्छ सामानको मूल्य त्यही हुने गरेको छ ।’ मूल्यांकनका आधार र कानुनी प्रावधानलाई बेवास्ता गरेर कर्मचारीको मनोमानी हावी हुँदै गएकाले आफूहरूले बाध्य भएर काम बन्द गर्नुपरेको गुनासो व्यापारीको रहेको छ । रसुवाका भन्सार प्रमुख रामप्रसाद पाठकले कडाइ गरेको भनेर प्रज्ञापन पत्र नभरेको व्यापारी बताए ।

भन्सार प्रमुख रामप्रसाद पाठक नाकाका प्रमुख बनेर आएपछि नै उनको कार्यशैली राम्रो नभएको चर्चा छ । उनीमाथि कोहीसँग पनि समन्वय नगर्ने र आफ्नो मनोमानी ढंगले चल्ने आरोप लागेको छ । नेपाल सरकार अर्थ मन्त्रालयअन्तर्गत रहेको भन्सार विभाग मातहत रहेको उक्त भन्सार कार्यालयबाट सन्तोषजनक काम नभएको चर्चा यतिवेला सिंहदरबारस्थित अर्थमन्त्रालयमा समेत हुने गरेको छ ।

Advertisement 2

पाठकको कार्यशैलीलाई लिएर नेपाली उद्योगी तथा व्यवसायीहरुमात्रै नभएर कर्मचारीहरु पनि खुशी छैनन् । भन्सार विभागका एक कर्मचारीका अनुसार भन्सार प्रमुख पाठक व्यापारीलाई आवश्कयताभन्दा बढी दुःख दिएको गुनासो आउने गरेको स्वीकारे ।

सात महिना अगाडि मेची भन्सार कार्यालयबाट सिधैं रसुवा भन्सार कार्यालयमा पुगेका  पाठकले रसुवा भन्सारको तस्करी प्रकरण सतहमा आएसँगै रसुवाबाट काठमाडौं आएर आफू बच्ने र साना माछालाई फसाउने गरी चलखेल तिव्र पारिरहेको भन्सार विभाग स्रोतले जनाएको छ । सात महिना अघि भन्सारका हर्ताकर्ता सेवन्तक पोखरेलहरुलाई खुशी पारेर पाठक रसुवा भन्सारको कमाण्ड सम्हाल्न पुगेका थिए ।

दैनिक करोडौ रुपैयाँ राजश्व असुली हुने यस भन्सार कार्यालयमा तीनदेखि ब्यापारीहरुको अनुपस्थितीले भन्सार असुली ठप्प भएको हो । आयातित सामानको खरिद बील, बजार मूल्य, गुणस्तर र स्वघोषणालाई बेवास्ता गरेर आफूखुसी अस्वभाविक रूपमा मूल्यांकन बढाउँदै करोडौ रुपैयाँ जरिबाना गर्न थालेपछि भन्सार जाँच पास नगरेको ब्यापारी बुद्धराज बस्नेतले बताए ।

उनीहरूले रसुवा भन्सारले जाँच गरेर सिल लगाइसकेको कन्टेनरलाई पनि पुनः मूल्यांकन गर्न लगाउने, व्यापारीको कुरै नसुन्ने र राजस्व पुगेको छैन तिर्नैपर्छ भनेर दबाब दिने गरेको दाबी ब्यापारीहरुले गरेका छन् । यस विषयमा बुझ्नको लागि उनीसँग फोन गर्दा सम्पर्कमा आउन चाहेनन् ।