वैदेशिक रोजगार विभागका महानिर्देशक मदन दाहालको शुक्रबार श्रम तथा व्यवसायजन्य सुरक्षा विभागमा सरुवा भएका छन्। गत जेठ २ मा मात्र विभागको जिम्मेवारीमा आएका उनले कार्यभार साढे ६ महिना सम्हालेका थिए।

Advertisement 1

विभाग आउनु अघि दाहाल श्रम मन्त्रालयमा थिए। त्यस अघि राजश्व अनुसन्धान विभागको महानिर्देशक थिए। दाहाल राजश्व अनुसन्धान विभागको महानिर्देशक हुँदा एउटा प्रभावशाली बैङ्कको कर छलीसम्बन्धी अनुसन्धानमा मुख्य व्यक्तिहरूको बयान लिनुअघि सरुवा भएको चर्चा चलेको थियो। श्रम, रोजगार तथा सामाजिक सुरक्षा मन्त्रालयका मन्त्री शरतसिंह भण्डारीले दाहाललाई वैदेशिक रोजगार विभागमा पठाएका थिए। अहिले श्रम मन्त्रालयको मन्त्रीस्तरीय निर्णयबाट दाहाललाई जिम्मेवारीबाट हटाइएको हो। साढे ६ महिनाअघि वैदेशिक रोजगार विभागको नेतृत्व सम्हालेका दहालले मेनपावर कम्पनीहरूको लाइसेन्स खारेज गर्नेदेखि निलम्बन गर्ने सम्मको काम सहित वैदेशिक रोजगारीको क्षेत्रमा सुधारको काम गर्दै थिए । म्यानपावरवालाहरु उनको सरुवा गर्ने शक्तिकेन्द्र धाइरहेका थिए । अन्तत म्यानपावरका मालिकहरुको चाह पूरा भएको छ ।

त्यस्तै वैदेशिक रोजगार ऐन विपरीत काम गर्ने केही म्यानपावर कम्पनीहरूलाई खारेज गरेका पनि थिए। उनले आफ्नो कार्यकालमा २ वटा मेनपावर व्यवसायीको लाइसेन्स खारेज गरेका थिए । १६ मेनपावर व्यवसायीलाई निलम्बन गरेका छन् भने ३२ वटा नयाँ मेनपावर कम्पनी दर्ता गराएका छन् । दाहालको कार्यकाल अवधिमा मेनपावर व्यवसायीबाट ठगिएको भन्दै २६९ उजुरी परेका थिए । जसमा १६२ मिलापत्र गराइएको छ । मेनपावर व्यवसायीबाट ठगी वापत २ करोड ९२ हजार ६१३ रुपैयाँ क्षतिपूर्ति पीडितलाई भुक्तानी गराइएको थियो । त्यस्तै व्यक्तिगत रूपमा ठगीको भन्दै ५९२ उजुरी परेका छन् । जसमा २३ करोड २७ लाख ९७ हजार रुपैयाँ क्षतिपूर्ति दाबी गरिएको थियो । ६० मुद्दा अदालतमा दर्ता भएका छन् । भने ६८ मुद्दा मिलापत्र गरिएको छ । वैदेशिक रोजगार व्यवसायलाई प्रवर्द्धन गर्दै सो व्यवसायलाई सुरक्षित, व्यवस्थित र मर्यादित बनाउने तथा वैदेशिक रोजगारमा जाने कामदार र वैदेशिक रोजगार व्यवसायीको हितको संरक्षणमा आफू सधैं लागिपरेको उनले बताए ।

Advertisement 2

विभागले इजाजत पत्र प्राप्त संस्था र तालिम प्रदाय संस्थाहरूको दर्ता तथा नवीकरण, नामसारी, ठाउँ सारी, वैदेशिक रोजगारीको सिलसिलामा ठगी परेका, अलपत्र परेका, सम्झौता बमोजिम काम र तलब सुविधा नपाएका कामदारहरूको सम्बन्धमा विभागले उच्च निगरानी राख्दै आएको उनको भनाई छ ।  पछिल्लो समयमा विभागले गरेको तीव्र अनुगमन तथा अनुसन्धानको कारण वैदेशिक रोजगार पिडितहरुको उत्साह र मनोवल बढ्दै गएको उनको भनाइ रहेको छ।