अख्तियार दुरुपयोग अनुसन्धान आयोगले तत्कालीन ५ मालपोत अधिकृतसहित १० कर्मचारीविरुद्ध विशेष अदालतमा मुद्धा दायर गरेको छ । अख्तियारले पर्साका तत्कालीन मालपोत अधिकृतहरु हरिनारायण मिश्र,भुपबहादुर बोगटी,गोपालबहादुर ढुंगाना, पदमप्रसाद अर्याल र चन्द्रबहादुर भण्डारी सहित सहित १० जनाविरुद्ध भ्रष्टाचार मुद्दा दायर गरेको छ ।

Advertisement 1

राजस्व चुहावट गरी भ्रष्टाचार गरेको आरोपमा उनीहरूविरुद्ध सोमवार विशेष अदालत काठमाडौंमा भ्रष्टाचार मुद्दा दायर गरेको हो । अख्तियारका अनुसार ९ बर्ष अघि मालपोत कार्यालय, पर्साको रजिष्ट्रेसन फाँट ‘ग’ का कर्मचारीहरूको मिलेमतोमा जग्गा किनबेचका क्रममा विभिन्न लिखतबाट उठेको राजस्व रकम नियम अनुसार दाखिला नगरी हिनामिना गरेको आयोगले विशेषमा दायर गरेको आरोपपत्रमा उल्लेख गरिएको छ ।

आयोगले तत्कालीन मालपोत अधिकृत हरिनारायण मिश्रले २ करोड ९ लाख ३१ हजार ६ सय ४७ रुपैयाँ, मालपोत अधिकृतहरू भुपबहादुर बोगटीले १ करोड ४९ लाख ६९ हजार १ सय ३५ रुपैयाँ, गोपालबहादुर ढुंगानाले ३५ लाख ४५ हजार ९५० रुपैयाँ, पदमप्रसाद अर्यालले १६ लाख ८१ हजार ६०० रुपैयाँ र चन्द्रबहादुर भण्डारीले २ लाख ४४ हजार ४६२ रुपैयाँ हिनामिना गरेको आरोपसहित सो को दोब्बर जरिवानाको मागदाबी गर्दै विशेष अदालतमा मुद्दा दायर गरेको छ ।

Advertisement 2

यस्तै, आयोगले तत्कालीन कम्प्युटर अधिकृत कमोद तिवारी र तत्कालीन नायब सुब्बा किरणप्रसाद उपाध्यायविरुद्ध पनि मुद्दा दायर गरेको छ ।तिवारीले १ करोड ४१ लाख ४७ हजार १७१ रुपैयाँ र उपाध्यायले ५ करोड ५५ लाख १९ हजार ९७५ रुपैयाँ हिनामिना गरेको दाबीसहित त्यसको दोब्बर जरिवानाको माग गर्दै मुद्दा दायर गरिएको आयोगले जनाएको छ ।

नायव सुब्बा किरणप्रसाद उपाध्यायबाट असुलउपर गर्नुपर्ने रकम उनका छोराहरूबाट दामासाहीले असुलउपर गर्ने प्रयोजनका लागि प्रतिवादी कायम गरिएको आयोगले जनाएको छ ।