सर्लाही — सशस्त्र प्रहरीले नेपाल–भारत सीमामा रहेका जीर्ण सीमा स्तम्भमर्मतको कार्य सुरु गरेको छ । सशस्त्रले सीमा स्तम्भको रङरोगनसमेत गरिरहेको छ ।

Advertisement 1

सर्लाहीसँग नेपाल–भारत सीमामा कुल ३ सय ४० सीमा स्तम्भ छन् । जसमध्ये १ सय ३७ सीमा स्तम्भ जीर्ण बनेका थिए । ती सीमा स्तम्भको मर्मत सुरु भएको सशस्त्र प्रहरी बल १० नम्बर गणका प्रमुख प्रहरी उपरीक्षक तुलबहादुर भण्डारीले जानकारी दिए । उनका अनुसार विष्णु गाउँपालिका–१ बाराउधोरणस्थित दशगजामा रहेको ३ सय ३३ नम्बरको सीमा स्तम्भ मर्मत सुरुआत गरिएको छ ।नेपाल–भारत सीमाकार्य समूहको पाँचौ बैठकमा सन् २०१४ पश्चात् मर्मत तथा निर्माण भएका सीमा स्तम्भहरुमध्ये जोर नम्बरको सीमास्तम्भ भारतीय सशस्त्र सीमा बल र बिजोर नम्बरको सीमा स्तम्भ सशस्त्र प्रहरी बलले मर्मत गर्ने निर्णय भएको थियो ।

नेपाल सरकार मन्त्रिपरिषद्‌को २०७७ साउन १९ गतेको निर्णयअनुसार सन् २०१४ पश्चात् मर्मत तथा निर्माण भएका बिजोर सीमा स्तम्भ सशस्त्र प्रहरीले मर्मत गर्ने जिम्मेवारी पाएको थियो । त्यही अनुरुप सीमा स्तम्भहरुको मर्मत भइरहेको सशस्त्र प्रहरीले जनाएको छ ।