आन्दोलनरत स्थानीय तह कर्मचारीहरुसँग वार्ता गर्नका लागि सरकारले सहसचिवको संयोजकत्वमा ४ सदस्यीय वार्ता समिति बनेको छ ।
१५ असोजदेखि राजधानी केन्द्रित सडक संघर्ष गरिरहेका स्थानीय तहका कर्मचारीहरुसँग वार्ता गर्नका लागि सहसचिव कमल भट्टराईको नेतृत्वमा चार सदस्यीय वार्ता समिति गठन भएको हो ।
वार्ता टोलीमा भट्टराईका अलवा सहसचिव नारायण प्रसाद अर्याल, कानुनका उपसचिव टङ्क बहादुर महत, प्रशासनका उपसचिव खिलराज राई रहेका छन् ।

Advertisement 1

यस अघि नै संघीय मामिला तथा सामान्य प्रशासन मन्त्रालयले आन्दोलनतरत स्थानीय तहका कर्मचारीलाई सरकारले वार्ताका लागि आह्वान गरेको थियो । गत मंगलबार संघीय मामिला तथा सामान्य प्रशासन मन्त्रालयले एक विज्ञप्ति जारी गर्दै मागको सम्बोधन छलफलबाट नै हुने भएकाले काममा फर्कन पनि मन्त्रालयले आग्रह गरेको थियो ।
तर आन्दोलनरत स्थानीय तहका कर्मचारीहरु आधिकारिक पत्र र आधिकारिक समिति विना वार्तामा नबस्ने अडान लिँदै आएका थिए ।वार्ता समितिले अहिले अपरान्ह संघीय मामिला तथा सामान्य प्रशासन मन्त्रालयमा वार्ताका लागि आह्वान गरेको जनाइएको छ ।