पैसावालको चिन्ता चाहिँ अनेक धन्दा गरेर कमाएको सम्पत्ति कहाँ हालौं भन्ने हुँदोरहेछ । त्यसैले एकातिर हाल्यो– डुबायो, फेरि थप्यो– लोभ ग¥यो । अहिले त्यस्तै अर्को लफडा आइलागेको छ,अन्नपूर्ण पोष्टका मालिक क्याप्टेन रामेश्वर थापालाई । सिम्रिक एयरका कारण नागरिक उड्डयन प्राधिकरणका महानिर्देशक प्रदीप अधिकारीसँगको लफडा नसल्टिदै क्याप्टेन थापाको जुहारी शुरु भएको छ,अहिले अल्का अस्पतालका अध्यक्ष कुमार थापासँग ।

Advertisement 1

हेलिकप्टर पाइलट तथा अन्नपूर्ण पोष्ट दैनिकका मालिक क्याप्टेन रामेश्वर थापा र अल्का अस्पतालका मालिक कुमार थापाबीचको लफडा उग्र रुप लिएर अहिले कम्पनी रजिष्ट्रारको कार्यालय त्रिपुरेश्वरसम्म पुगेको छ ।

कुमार थापाले तीन दशकदेखि अल्का फार्मेसी खोलेका थिए छोरीको नाममा । ०५९ सालमा पोलिक्लिनिक हुँदै ६२ सालमा त्यसलाई अस्पतालमा बनाएका थिए । अस्पताल बनेको १४ बर्ष पछि शेयर होल्डर बनेर भित्रिए रामेश्वर थापा । उनीसँग ०७६ साल असारमा सम्झौता भएको र सोही बर्ष साउनदेखि ४९ प्रतिशत शेयर स्वामित्व लिएर एस.एस.जी. इन्भेष्टमेन्ट कम्पनीमार्फत अल्कामा इन्ट्री भएका हुन । जहाँ कुमार थापाको ५१ प्रतिशत अर्थात १४ लाख ९५ हजार ३ सय ६४ कित्ता र रामेश्वरको एक कित्ता कम शेयर स्वामित्व रहेको बताइएको छ । अल्काको सञ्चालक समितिमा तिलक बहादुर पुवर थापा (कुमार) अध्यक्ष,विद्या श्रेष्ठ थापा उपाध्यक्ष र निर्देशकका रुपमा क्याप्टेन रामेश्वर थापा छन् । थापाले आफ्नो तर्फबाट दुई जना शेयरधनी हुनुपर्ने र शेयर स्वामित्व ५०/५० प्रतिशत हुनुपर्ने माग गरेर उजुरी दिएका थिए । बार्षिक १० करोड बढी मुनाफा आर्जन गर्दै आइरहेको अल्कामा कुमार थापासँग सो शेयर संरचना बराबरी शेयर हैसियत र सञ्चालक समितिमा समान हैसियत माग्दै उनी त्रिपुरेश्वरस्थित कम्पनी रजिष्ट्रारको कार्यालयमा उजुरी बोकेर पुगेका हुन ।

Advertisement 2

कम्पनी रजिष्ट्रारले अल्पमत शेयर धनीको पीरमर्का र गुनासो सुन्दै आएको छ । सोही उजुरी पछि कम्पनी रजिष्ट्रारको कार्यालयले दुबै पक्षलाई अस्ति बिहिबार छलफलका लागि डाकेको थियो तर बिहिबार रामेश्वरको तर्फबाट कोही उपस्थित भएनन । भोलिपल्ट अर्थात अस्ति शुक्रवार कम्पनी रजिष्टार्डले दुवै पक्षलाई डाक्यो ।

अस्ति शुक्रवार अल्काको तर्फबाट कुमार थापा,कम्पनी सचिव राजु थापा र उनीहरुको वकिल विपिन सुवेदी त्रिपुरेश्वर पुगेका थिए भने रामेश्वरको तर्फबाट अल्का अस्पतालको बारेमा खासै जानकारी नभएको वकिललाई त्यहाँ पठाइएको थियो । ती वकिलले शेयर स्वामित्व र हैसियत बराबरी हुनुपर्ने जिकिर मात्र गरेर फर्किएका छन् ।
यी दुईबीचको लफडामा कम्पनी रजिष्ट्रार कार्यालयका रजिष्ट्रारले निर्णय केही निर्णय गरिसकेका छैनन् ।