झोला खरिदमा सात लाख हिनामिना गरेको अभियोगमा अख्तियार दुरुपयोग अनुसन्धान आयोगले भूमि व्यवस्था, कृषि तथा सहकारी मन्त्रालय, सहकारी तथा गरिबी निवारण शाखा मधेश प्रदेश जनकपुरधामका वरिष्ठ शाखा अधिकृत ओमनारायण झा सहित सप्लायर्स नैंशी जेनरल अर्डरका मालिक अरहुला कुमारीविरुद्ध भ्रष्टाचार मुद्दा दायर गरेको छ ।
अख्तियारले शाखा अधिकृत र सप्लायर्सविरुद्ध सात लाख हिनामिना गरेको अभियोगसहित विशेष अदालतमा मुद्धा दायर गरेको हो ।

Advertisement 1

अख्तियारका अनुसार,सहकारीको आयमूलक तालिम सञ्चालनका लागि विनियोजन भएको रकम हिनामिना गरेको आरोपमा उनीहरू मुद्धा दायर गरेको हो ।

अधिकृत झाले आर्थिक वर्ष २०७८/ ०७९ मा सहकारीको आय मूलक तालिम सञ्चालन नगरी एवं प्रक्रिया नपुर्‍याई पेस्की दिएको, नक्कली बिल भरपाई पेश गरी पेस्की रकम फर्छ्यौट गरेको पाइएको थियो ।

Advertisement 2

साथै उनले अस्वाभाविक रुपमा बढी मूल्य तिरी झोला खरिद गरेको देखाई बढी भुक्तानी लिएको पाइएको आयोगले जनाएको छ । आयोगले उनीविरुद्ध ७ लाख एक हजार तीन सय ८० रुपैयाँ बिगो कायम गरी कैद र बिगो बमोजिमको जरिवाना असुलउपरको मागदाबी गरेको छ ।

यस्तै, नैंशी जेनरल अर्डर सप्लायर्सका प्रोप्राइटर कुमारीले आफू र प्रतिवादी झालाई गैरकानूनी लाभ पुर्‍याउनका लागि बढी मूल्य तिरी झोला खरिद गरेको पाइएको अख्तियारले जनाएको छ ।

आयोगले प्रोप्राइटर कुमारीविरुद्ध ३ लाख ६८ हजार ८८० रुपैयाँ बिगो कायम गरी बिगो असुलउपरको मागदाबी गर्दै विशेष अदालत काठमाडौंमा मुद्दा दायर गरेको हो ।