माधव नेपालको साथ छाडेर केपी ओलीका पछाडि लागेका आधिकारिक कर्मचारी ट्रेड युनियनका निमित्त अध्यक्ष भोला पोखरेलले एमाले अध्यक्ष केपी शर्मा ओलीलाई भगवानको संज्ञा दिएका छन् ।

Advertisement 1

एमालेसम्बद्ध पेशागत महासंघले जेठ ५ गते शनिवार बबरमहलस्थित कार्की व्यांक्वेटमा आयोजना गरेको स्थापना दिवश कार्यक्रममा उनले केपी शर्मा ओलीको ‘धीत मर्ने गरी’ भाषण गरे । उनले भने, ‘हामीलाई ट्रेड युनियन दिएकै ओली कमरेडले हो । उहाँ नभएको भए ट्रेड युनियन भन्ने नै खारेजीमा पर्न लागेको थियो । त्यसैले उहाँ हाम्रो भगवान हो ’ माधव नेपाल नेतृत्वको एकीकृत समाजवादी छोडेर एमालेमा फर्किएका र हालैमात्र पेशागत महासंघका उपाध्यक्ष बनेका भोला पोखरेलले आफ्नो बोल्ने पालामा ओलीले त्यो कुरा सम्झिँदै भन्नुभयो, ‘हो, मैले नै त हो ट्रेड युनियन दिएको । भोलाले ठीक भन्नुभयो…’

पेशाकर्मीहरुको उक्त भेलामा महासंघभित्र विभिन्न सेवाका बहालवाला तथा निवृत्त कर्मचारी संगठित छन् । केही वक्ताले निजामती कर्मचारीहरुको उमेर हद ५५ मा झार्नुपर्ने कुरा उठाए । ‘बूढाखाडाले पद ओगट्दा तलबाट सरकारी सेवामा प्रवेश गर्ने युवाहरू जाममा पर्छन् । त्यसैले ५५ वर्ष कटेका कर्मचारीलाई रिटायरमेन्ट दिएर निजामती सेवामा युवालाई अवसर सुनिश्चित गर्नुपर्छ ।’ पेशाकर्मीहरुले यस्तो आवाज उठाएपछि केपी शर्मा ओलीले पनि मञ्चबाटै जवाफ दिनुभयो, ‘५५ वर्षमा जागिर छाडेर अर्को काम गर्ने, पेन्सन पनि खाने ? यस्तो हुँदैन । लु, ५५ नै वर्षमा रिटायर्ड हुने भए पनि पेन्सनचाहिँ ६० लागेपछि दिऊँ न त

Advertisement 2

कार्यक्रममा योजना आयोगका सहसचिव सुमन दाहाल कार्यपत्र प्रस्तुत गर्दै थिए । कर्मचारी नै भ्रष्टिकरणबाट मुक्त हुनुपर्ने उनको आशय थियो । पर्यटन मन्त्रालयअन्तर्गत विभिन्न हिमालको आरोहण तथा पदयात्रीका रुपमा विदेशबाट आउने पाहुनाको सहजीकरणका लागि सम्पर्क अधिकृत (लियाजो अफिसर) तोक्ने गरिन्छ । यस्तोमा विदेशीले भोग्ने अप्ठेरा–सजिला मामिलामा राज्यले सहजीकरण दिलाउनु स्वाभाविक हो । तर, कर्मचारी खटाउने चलन भने विज्ञता नभएर भागबण्डामा आधारित रहेछ । विभिन्न राजनीतिक दलनिकट कर्मचारी संघ–संगठनलाई भाग लगाएर लियाजो अफिसर तोकिँदा कतिपय ड्युटीमा जाँदैनन्, काठमाडौं बसीबसी, कागजात मिलाएर लाखौं भत्ता बुझ्छन् । दाहालले यसबारे कार्यपत्र प्रस्तुत गर्दागर्दै पूर्वअर्थ सचिव शिशिरकुमार ढुंगानाले भने, ‘यो प्रथाको अन्त्य हुनुपर्छ ।’ जबकि, सुमनको कार्यपत्रमाथि टिप्पणी गर्न शिशिरसहित पूर्वअर्थ मन्त्रीसमेत रहिसकेका पूर्वगभर्नर डा.युवराज खतिवडा र पूर्व सामान्य प्रशासन सचिव पूर्णचन्द्र भट्टराईहरू तोकिएका थिए । अरु पूर्वसचिव चूपचाप सुनिरहेका थिए, तर शिशिर मौन बस्नै सकेनन् ।
त्यहाँ दुई किसिमका कर्मचारी थिए । एकखाले– पुण्यप्रसाद ढकाल, केदार देवकोटा, भोला पोखरेलजस्ता जीवनभर ट्रेड युनियनका नेताहरू । अर्काखाले– जागिरै अधिकृतबाट शुरु गरी सचिव, सहसचिवबाट अवकास पाएका । लियाजो अफिसरको विसंगति हटाउनुपर्छ भन्दा ‘हो–हो’ भन्ने शिशिर ढुंगानाहरूलाई ट्रेड युनियनवालाले रिस गरिरहेका थिए । किनभने, एउटा लियाजो अफिसरले एक सिजनमा एउटा यात्राबाट लाखौं रुपैयाँ कमाउँछ र उसलाई सिफारिस गर्ने कर्मचारी नेताको भागमा पनि कोशेली हात पर्छ ।

माथिल्लो दर्जाबाट रिटायर्ड भएका पूर्वहाकिमहरू चाहिँ यो देशको विकासको सम्पूर्ण बाधक नै ट्रेड युनियन हो भनिरहेका थिए ।