सिराहाको दक्षिणी सीमावर्ती बरियारपट्टी प्रमुख प्रशासकीय अधिकृत को हो भन्ने विवाद उत्कर्षमा पुगेको छ। जसका कारण त्यहाँ दुई पक्षबीच तनावमात्र उत्पन्न भएको छैन कि मुठभेडकै अवस्था सिर्जना हुने खतरा बढेको छ।
संघीय मामिला तथा सामान्य प्रशासन मन्त्रालयको पत्रका कारण बरियारपट्टीको प्रमुख प्रशासकीय अधिकृत पदमा दुई जना कर्मचारीले दाबी गरेपछि विवाद चुलिएको हो।
संघीय मामिला तथा सामान्य प्रशासन मन्त्रालयको बदमासीका कारण यस्तो स्थिती पैदा भएको हो ।

Advertisement 1

मन्त्रालयले गरेको सरुवामा एकैदिन दुई जना अधिकृतलाई प्रमुख प्रशासकीय अधिकृतका रुपमा गाउँपालिकामा खटाएपछि यहाँ विवाद पैदा भएको हो ।
पालिकामा प्रमुख प्रशासकीय अधिकृतको रुपमा अशोककुमार सिंह र सुजितकुमार यादवलाई खटाइएपछि विवाद उत्पन्न भएको हो । सिंह १६ फागुनमा हाजिर भइ काम काज गर्दै आइरहेका छन् भने यादव सरुवाको पत्र बोकेर २९ फागुनमा गाउँपालिकामा पुगेका थिए । एउटा अधिकृत हाजिर भएको १३ दिनपछि अर्को अधिकृत आएर सुटुक्क हाजिर भएपछि झन् आधिकारिकताको अन्योल बढेको छ ।

सिंह यस अघि पनि सोही पालिकामा कार्यरत थिए । उनी झण्डै डेढ बर्ष सोही पालिकामा काम गरिसकेका कर्मचारी हुन ।पालिकाको वेवमा सिंहलाई प्रमुख प्रशासकीय अधिकृतको रुपमा राखिएको छ ।