दोलखाको तामाकोसी गाउँपालिका एक महिनादेखि प्रमुख प्रशासकीय अधिकृतविहीन बन्दा गाउँपालिकाबाट प्रवाह हुने नियमित सेवा प्रवाह प्रभावित बनेको छ । गाउँपालिकाका प्रशासकीय अधिकृतका रूपमा काम गर्दै आउनुभएका गोरखनाथ मिश्र गत पुस ८ गते हाजिर गरेर बिदा बस्नुभएको हो ।

Advertisement 1

प्रशासकीय अधिकृत मिश्रले पशु शाखाप्रमुख कुशबहादुर जिरेललाई निमित्त प्रमुख प्रशासकीय अधिकृतको जिम्मेवारी दिएर बिदामा बस्नुभएको गाउँपालिकाले जनाएको छ । अधिकृत मिश्रले जिम्मेवारी दिएको पत्रमा आफू बिदामा बसेको र अर्को प्रशासकीय अधिकृत नआउन्जेलसम्म निमित्त प्रशासकीय जिम्मेवारी तोकिएको उल्लेख छ । निमित्तको जिम्मेवारी तोकेर बिदामा बस्नुभएका प्रमुख प्रशासकीय अधिकृत कार्यालय फर्किने वा नफर्किने केही जानकारी नभएको गाउँपालिकाले जनाएको छ । योजना तथा कार्यक्रम कार्यान्वयन, आर्थिक कारोबार र प्रशासन सञ्चालनको नेतृत्व भूमिकामा रहने प्रशासकीय अधिकृत नहुँदा सेवा लिन पुगेका सेवाग्राही त्यसै फर्किने गरेको स्थानीय सुन्दर कार्कीले बताउनुभयो ।

तामाकोसी गाउँपालिकाका अध्यक्ष प्रोणप्रताप केसीले प्रमुख प्रशासकीय अधिकृत बिदामा बसेर कार्यालय नफर्किएको बताउँदै नयाँ प्रमुख प्रशासकीय अधिकृत छिट्टै ल्याउने तयारी भइरहेको बताउनुभयो ।