देशकै एउटा ठूलो महानगरपालिका । सबैको चासोको केन्द्र विन्दु । पूर्व प्रधानमन्त्री तथा माओवादी अध्यक्ष प्रचण्ड पुत्री रेनु मेयर भएकै कारण पनि चर्चा र चासोको रुपमा हेरिने ठाउँ हो भरतपुर महानगरपालिका । जहाँ निजामती तर्फ २७९ कर्मचारीको दरबन्दी छ भने स्वास्थ्य सेवातर्फ १३१,करार सेवामा कार्यरत ६१,ज्यालादारी १००,करार (स्वास्थ्य सेवा) १०० कर्मचारी नै कार्यरत छन् । झण्डै ५ सय कर्मचारी कार्यरत रहेको महानगरपालिकाभित्र उत्कृष्ट कार्यसम्पादन गर्ने केही कर्मचारीहरु छन् । जो सरल,कर्तव्य परायण,इमान्दार र मेहनती छन् ।
यस्तै मध्येका एक हुन बुद्धिसागर न्यौपाने । पदले नायब सुब्बा तर इमानदार, लगनशील र कर्तव्यपरायणमा अब्बल । जो अहोरात्र खटिन्छन् कर्ममा । भरतपुर–१, देवघाट निवासी बुद्धिसागर न्यौपाने भरतपुर महानगरपालिकाको पुराना कर्मचारी हुन् । २०६० देखि खरदारबाट जागिर सुरु गरेका उनी अहिले महानगरपालिकाको नायव सुब्बा छन् ।
उनी हाकिमहरुको समेत प्रिय पात्रका रुपमा चिनिन्छन् । प्राय जसो प्रमुख कार्यकारी अधिकृत (सहसचिव)को सचिवालयमा रोजाईको पात्र बन्दै आएका छन् । बुद्धिसागर यसअघि पनि हाकिमहरुको मन जित्न सफल भएर हाकिमको स्वकीय सचिव हुँदै आएका कर्मचारी हुन् । हाकिम महेश बराल र प्रेमराज जोशीले स्वकीय सचिवको जिम्मेवारी बुद्धिलाई नै सुम्पिएका थिए । अहिलेका प्रमुख प्रशासकीय अधिकृतले पनि उनैलाई सचिवालयमा रोजेका छन् ।

Advertisement 1

आफूले सचिवालयको लागि राम्रो काम गर्ने कर्मचारी खोज्दा ‘बुद्धि नै राम्रा छन्, राम्रो काम गर्छन्’ भन्ने थाहा पाएर उनलाई स्वकीय सचिव बनाएको भरतपुर महानगरपालिकाका प्रमुख प्रशासकीय अधिकृत रामबन्धु सुवेदीले बताए । उनले भने,सबै काम बुझेका छन् । इमानदार छन् । ओभरल सबै काम गर्छन् । सचिवालयको मात्र होइन कि बाहिरको पनि गर्नुपर्ने र लगाइएका, अफिसमा आइपरेका सबै काम गर्न अग्रसर हुन्छन् । बिहानदेखि बेलुकीसम्म अफिसमा खट्ने बुद्धि मेहनती र लगनशील छन् ।’
सबै जनासँग घुलमिल हुने स्वभाव भएको, राम्रो काम गर्ने मान्छे सबैको प्यारो र सम्मानित हुने प्रमुख प्रशासकीय अधिकृतकै सचिवालयमा कार्यरत कर्मचारी देवी गुरुङले बताइन् ।
उनको कार्यशैलीकै कारण यसबीच तीनपटक उनी सम्मानित भइसकेका छन् । महानगरपालिकालाई स्वच्छ, सफा र सुन्दर बनाउनका लागि फोहोर उत्सर्जन न्यूनीकरण र दिगो व्यवस्थापन कार्यमा महत्वपूर्ण योगदान पु¥याएबापत पछिल्लोपटक विश्व वातावरण दिवस २०२२ को अवसरमा उनी सम्मानित भए ।
बुद्धिसागर कार्यालयको उत्कृष्ट कर्मचारीको रुपमा गत २०७४ मा सम्मानित भएका थिए । यसैगरी, २०७३ मा पनि कार्यालयले उत्कृष्ट कर्मचारीको रुपमा उनलाई सम्मान गरेको थियो ।
यस्ता कर्मचारीहरु बेलाबेलामा सम्मानित र पुरस्कृत हुनु पनि पर्दछ । यसले उनीहरुको हौसला र कामप्रतिको लगाव अझ बढाउँछ, अरुलाई पनि योग्य, उत्कृष्ट कर्मचारी बन्न प्रेरित गर्छ । कार्यालयबाट पटक–पटक सम्मानित भरतपुर महानगरपालिकाका कर्मचारी बुद्धिसागर न्यौपाने भन्छन्, ‘आफ्नो कामको कदर हुँदा गौरवलाग्दो रहेछ, कामप्रति लगाव र प्रेम बढ्दो रहेछ । थप जिम्मेवार बनाउँदै अझ राम्रो काम गर्न प्रोत्साहित गर्दो रहेछ ।
उनले लामो समय महानगरपालिकाको वातावरण शाखामा रहेर सरसफाइको क्षेत्रमा धेरै काम गरे । बुद्धिसागर अहिले पनि हाकिमको सचिवालयमा स्वकीय सचिव छन् । साथसाथै सरसफाइ फाँट पनि उनले हेर्ने गरेकै छन् । उनी भन्छन,भरतपुर महानगरपालिकालाई सरसफाइमा देशकै नमूना शहर बनाउन चाहन्छौं । महानगरलाई स्वच्छ, सफा, सुन्दर बनाउन मेयर, उपमेयर, प्रमुख प्रशासकीय अधिकृतज्यूहरु लागिरहनुभएको छ, उहाँहरुको चाहना पूरा गर्नु मेरो सफलता हो ।’
वातावरण शाखामा कार्यरत सुपरभाइजर अभय तिमिल्सिना जस्तोसुकै काम पनि सजिलोसँग÷सरलतापूर्वक गर्नसक्ने खुबी बुद्धिसागरमा भएको बताउँछन् । उनी भन्छन्, ‘उहाँ कामलाई सानो–ठूलो भन्नुहुन्न । आफू पनि काम गर्ने र अरुलाई पनि काममा लगाउन सक्षम हुनुहुन्छ । बिहानदेखि बेलुकासम्म खटिनुहुन्छ ।’

बुद्धि बिहान सातै बजे कार्यालय आइपुग्छन् । कार्यालयको कम्पाउण्ड सरसफाइ हेर्छन् । महानगरपालिकाको सरसफाइमा भएका समस्या बुझ्छन् र त्यसलाई सहजीकरण गर्ने काम गर्छन् । बेवारिसे लास समेत उनले हेर्छन् । बेलुकी पनि प्रमुख प्रशासकीय अधिकृत आवासमा गएपछि मात्रै ६÷७ बजे उनी कार्यालयबाट फर्किन्छन् ।

Advertisement 2

हाकिमको सचिवालयको काम गर्दा दिनहुँ सेवाग्राहीसँग प्रत्यक्ष ठोकिन्छन् । सेवाग्राहीको आवश्यकता, चाहना र समस्या बुझेर सहजीकरण गर्नुपर्छ उनले र गर्छन पनि । सेवाग्राहीलाई सरलरुपमा प्रक्रिया बुझाउन र काममा सघाउन पोख्त मानिन्छन् उनी । त्यसैले प्रमुख प्रशासकीय अधिकृतको सचिवालयमा फेरि उनैलाई ल्याइएको हो ।

– अजय गोर्खाली