Advertisement 1

नेपाल सरकारका बहालवाला सचिव मधुसुदन बुर्लाकोटीले अर्थ र सामान्य प्रशासन मन्त्रालयप्रति रोष प्रकट गरेका छन् । हाल सार्वजनिक खरिद अनुगमन कार्यालयको सचिवको भूमिकामा रहेका सचिव बुर्लाकोटीले अर्थ मन्त्रालयले बजेट नदिएको र संघीय मामिला तथा सामान्य प्रशासन मन्त्रालयले कर्मचारी नदिएको प्रति रोष प्रकट गरेका छन् ।

Advertisement 2

उनले सामाजिक सञ्जालबाटै अर्थ र सामान्य प्रशासन मन्त्रालयप्रतिको व्यवहारप्रति तिव्र असन्तुष्टि जनाउँदै आफ्नो जागिरे जीवनप्रति धिक्कारेका छन् । सचिव बुर्लाकोटीले लेखेका छन् अर्थमा बजेट माग्दा सबै पैसा निकालेर बाउको लंगौटी, आमा र बुढिको धोती र बच्चाको नाना किन्ला जस्तो गर्छन । सामान्यमा कर्मचारी माग्यो घरमा लगेर काम लगाउंछन जस्तो गर्छन। थुईक्क जागिर न छोड्न सकिने न राम्ररी तोकिएको काम गर्न सकिने । सचिव बुर्लाकोटीले अर्थले भनेजति बजेट नदिएको र संघीय मामिला तथा सामान्य प्रशासन मन्त्रालयसँग माग गरे जति कर्मचारी उपलब्ध नगराउँदा काम गर्न समस्या भएको जनाएका छन् ।

सार्वजनिक खरिद अनुगमनको कार्यालयले माग गरेको प्राविधिक कर्मचारी सामान्य प्रशासन मन्त्रालयले नदिएपछि सचिव बुर्लाकोटीले आक्रोश र पीडा पोखेका हुन ।
खरो स्वभावका सचिव बुर्लाकोटीले केही महिना अघि पूर्व सचिव भीम उपाध्यायलाई यसै गरी दनक दिएका थिए । सार्वजनिक खरिद अनुगमन कार्यालयको वेबसाइटमा हटिसकेका प्रधानमन्त्री केपी शर्मा ओलीकै तस्विर राखिएको भन्दै उपाध्यायले अनर्गल प्रचार गरेपछि उनले सामाजिक सञ्जालबाटै स्पष्टीकरणसहित दनक दिएका थिए । उनले त्यतिबेला उपाध्यायलाई सर्पको खुट्टा सर्पले देख्छ भन्दै सार्वजनिक रुपमा चुनौति दिएका थिए तपाई सार्वजनिक पदमा बहाल रहँदा गरेका उल्लेखनीय १० कामको उल्लेखनीय काम जम्मा गर्नुस् अनि यहाँको त्यतिखेरका सहयोगी साथीहरूसहित लाइभ कार्यक्रममा बसौँ अनि अरूलाई मूल्याङ्कन गर्न दिऔँ ।

बुर्लाकोटी तिनै सचिव हुन जो यातायात व्यवस्था विभागको डिजी हुँदा सार्वजनिक सबारी साधनमा इम्बोइष्ट नम्बर प्लेट जडान गर्ने प्रक्रिया अगाडि बढाउन नमान्दा उनलाई त्यहाँबाट हटाएर अहिले रिटायर्ड भइसकेका चन्द्रमान श्रेष्ठलाई डिजी बनाइ सो काम तमाम गरिएको थियो ।