काठमाडौंको बालाजु औद्योगिक क्षेत्रभित्र रहेको नेविको बिस्कुटको कारखाना पुनः सञ्चालनमा आएको छ ।
गत साउन २३ गते भएको आगलागीका कारण बन्द रहेको नेविको बिस्कुटको कारखाना बुधबारबाट पुनः सञ्चालनमा आएको हो । बुधबार कम्पनीले पत्रकार सम्मेलन आयोजना गरी सञ्चालनमा आएको जानकारी दिएको हो ।
कारखाना पूर्णरुपमा सञ्चालनमा आउन अझै केही समय लाग्ने कम्पनीको भनाइ छ । प्रमुख कार्यकारी निर्देशक केशव भट्टराईले पहिलो चरणमा दैनिक १६ टन मात्रै उत्पादन गर्ने लक्ष्य रहेको बताए । उनले आगलागीका कारण मेसिन पूर्णरुपमा ध्वस्त भएकाले पहिलेको क्षमता भन्दा कम उत्पादन हुने बताए । उनले यसअघि सरदरमा दैनिक २० देखि २२ टन बिस्कुट उत्पादन हुने गरेको पनि बताए ।
यस्तै आगलागीबाट करिब २२ करोड रुपैयाँ बराबरको क्षति भएको कार्यकारी निर्देशक भट्टराईले बताए । जसमध्ये १२ करोड रुपैयाँ अनुमानित कच्चा पदार्थमा र बाँकी मेसिन र घरमा क्षति पुगेको उनले बताए । मेसिन र घरको क्षतिको पूर्णविवरण अझै नआएको कम्पनीले जनाएको छ ।
नेविकोले करिब ५८ वर्षदेखि आफ्ना उत्पादनहरु बजारमा बिक्री वितरण गर्दै आएको छ । नेपालमा अन्तर्राष्ट्रिय कम्पनीका बिस्कुटहरु नभित्रिएको समयमा नेबिकोका ग्लुकोज, कोकोनटलगायतका बिस्कुटले राम्रो बजार लिएको थियो ।