निर्वाचन आयोगसँग आगामी स्थानीय निर्वाचनको निम्ति अब मुश्किलले ६० दिनको समय छ । दक्ष जनशक्तिको अभावमा राष्ट्रिय महत्वको निर्वाचन सफलताका साथ सम्पन्न गर्न गाह्रो हुने भएपछि आयोगको काममा निपुण एक जना सहसचिव माग्दा सामान्य प्रशासन मन्त्रालयले अर्कैलाई पठाइदिएपछि आयोगका पुरुष पदाधिकारीहरुले शीरको ढाका टोपी फनफनी घुमाएका छन् ।

Advertisement 1

आयोगका एक जना आयुक्तले भने, ‘सहसचिव मागेको एउटा,सामान्यले अर्कै पठाइदियो । आयोगमा लामो समयसम्म काम गरेका उपसचिव बढुवा भएपछि अन्यत्र सरुवा गर्नुको साटो आयोगमै पठाइदेऊ न भन्दा पनि सुनेनन् ।’

आयोगमा लामो समय काम गरेका उपसचिव कोमल धमला हुन् । उनी बढुवापछि सहसचिव भएकाले त्यहाँबाट सरुवा गरियो । अहिले अतिरिक्तमा राखिएका धमलालाई पठाइदेऊ न भन्दा पनि टेरपुच्छर नलगाएको आयोग स्रोतको दाबी छ । जबकि दरबन्दी खालि हुँदा पनि कुरो नसुनेकोमा उनीहरु खिन्न भएका हुन् ।

Advertisement 2

कोमल माग्दा सामान्यले तुलसीबहादुर श्रेष्ठलाई पठाइदिएको छ । उनी झापातिर नगरपालिकामा कार्यकारी अधिकृत भएर डुलेका सहसचिव हुन् । उनले ठ्याक्कै मन्त्रीलाई गएर भनेपछि आयोगमा पठाइएको बताइन्छ ।

‘कुरो कायाकल्प गर्ने भन्छन् तर सिन्को भाँच्दैनन् ।’

आयोगका एक जना कर्मचारीले भने,‘न यो कुनै आकर्षक ठाउँ हो । न श्रेष्ठ सरले आयोगको काम नै जान्नुभएको छ । चुनावभरि बस्ने र भत्ता खाएपछि हिँड्ने मनशाय हुनसक्छ । तर आयोगले काम जानेको मान्छे खोजेको हो । जबकि कोमलले आगामी चार वर्ष कहिँ जाँदिनसमेत भन्नुभएको थियो ।’

मन्त्रीले नै फोन गरेर ‘तुलसीलाई पठाउने भइयो है’ भन्ने खबर गरेपछि आयोगका पदाधिकारीहरु नतमस्तक भएका थिए ।

अहिले आयोगमा अझै सात जना शाखा अधिकृत आवश्यक रहेको बताइन्छ । त्यो पनि पठाइएको छैन । ‘अनुभवी चाहिएकोमा त्यस्तै सहसचिव जस्ता पठाइदिने हो कि भन्ने डर छ,’ स्रोतले भन्यो ।

आयोगको सूचना शाखामा काम गर्ने आईटीका कर्मचारी पनि ‘थपना’ मात्रै भएको भन्दै प्रशासन र लेखाका कर्मचारीले दुःखेसो पोखेका छन् । ‘कुरो कायाकल्प गर्ने भन्छन् तर सिन्को भाँच्दैनन् ।’