अर्थ सचिव मधुकुमार मरासिनीले सरुवा–बढुवाका लागि सोर्स फोर्स लगाउने काम बन्द गर्न कर्मचारीहरुलाई निर्देशन दिएका छन् । भन्सार विभागले आयोजना गरेको दुई दिने भन्सार व्यवस्थापन गोष्ठीलाई आज आइतवार सम्बोधन गर्दै अर्थ सचिव मरासिनीले सरुवा वा बढुवाका लागि कुनै पनि दल, नेता वा सङ्गठनको फोन लगाउने कार्य तत्काल बन्द गर्न कर्मचारीहरुलाई निर्देशन दिएका हुन् ।
कार्यक्रममा बोल्दै सचिव मरासिनीले सरुवाका लागि फोन गराइ दबाब सिर्जना गर्ने कर्मचारीहरूको माग सुनुवाइ नहुने स्पष्ट पार्दै भने,त्यसरी फोनमा सोर्स फोर्स लगाउने कर्मचारीले आफ्नो इन्टिग्रेटीमा कम्प्रोमाइज गरिसकेको हुन्छ, इन्टिग्रेटी गुमाइसकेका कर्मचारीले कस्तो काम गर्छन् ? त्यो आफैँ बुझ्नुहुन्छ ।
उनले भन्सार प्रशासनलाई तीन स अर्थात सुधार, सहजीकरण र सुशासनको अवधारणालाई आत्मसात् गरी काम गर्नुपर्नेमा जोड दिए ।
कार्यक्रममा राजश्व सचिव कृष्णहरि पुष्करले सेवाग्राहीले कर्मचारीको इमानदारितामाथि कुनै पनि प्रकारका प्रश्न उठाउन नसक्ने गरी काम गर्न निर्देशन दिएका थिए ।

Advertisement 1

यस्तै सोही कार्यक्रममा भन्सार विभागका महानिर्देशक नारायणप्रसाद सापकोटाले लक्ष्यअनुसारको राजस्व सङ्कलन गरिने प्रतिवद्धता व्यक्त गर्दै सदाचारलाई शिरमा तथा देशको हितलाई छातीमा राखेर काम गर्न मातहतका कार्यालय प्रमुख तथा कर्मचारीहरूलाई निर्देशन दिएका थिए ।