भीमफेदी कारागारका १ सय ६८ कैदीबन्दी अझै फरार
बागमती। मकवानपुरको भीमफेदीस्थित क्षेत्रीय कारागारबाट फरार भएकामध्ये २ सय ७२ जना कैदीबन्दी कारागार फर्किएका छन्भने १ सय ६८ जना कैदीबन्दी अझै फरार छन्।
Advertisement 1
गत भदौ २४ गते राति कारागारको पर्खाल भत्काएर फरार भएका ४ सय ४० कैदीबन्दीमध्ये आज बिहानसम्म २ सय ७२ कैदीबन्दी कारागार फर्किएको कारागारका प्रमुख सुवास पौडेलले जानकारी दिए। कारागारबाट भागेकामध्ये हालसम्म २ सय ७२ र अन्य कारागारबाट फरार ३७ गरी ३ सय ९ कैदीबन्दी भीमफेदी कारागार फर्किएको प्रमुख पौडेलले बताए।
प्रमुख पौडेलका अनुसार भागेकामध्ये भीमफेदी कारागारका १ सय ६८ कैदीबन्दी आझै फरार छन्। फरार भएका ३९ जना विदेशी कैदीबन्दीमध्ये १३ जना कारागार फर्किएको र २६ जना अझै फरार छन्। फरार कैदीबन्दीको खोजीका क्रममा सुरक्षाकर्मीले बिभिन्न स्थानबाट उनीहरूलाई नियन्त्रणमा लिई कारागारमा बुझाएको प्रमुख पौडेलले बताए। कारागारबाट भागेका फरार कैदीबन्दीको खोजीकार्य तीव्र पारिएको जिल्ला प्रहरी कार्यालय मकवानपुरका प्रवक्ता पुष्कर बोगटीले बताए।
