काठमाडौं। नेपाल प्रिमियर क्रिकेट लिग (एनपिएल)मा सुदूरपश्चिम प्रदेशको प्रतिनिधित्व गर्ने टोली सुदूरपश्चिम रोएल्समा प्राय सुदूरपश्चिमका खेलाडीको वर्चश्व देखिएको छ। नेपाली क्रिकेट इतिहासमा अलराउन्डतर्फ विश्व क्रिकेट वरियतामा दोस्रो स्थानमा रहेका दीपेन्द्रसिंह ऐरी सुदूरपश्चिम रोयल्सको भरोसायुक्त खेलाडी हुन्। सुदूरपश्चिममा जन्मिएका २४ वर्षीय ऐरी टोलीको मार्की खेलाडी हुन्।

Advertisement 1

सुदूरपश्चिममा आइकोनिकसहित सात खेलाडी सुदूरपश्चिम क्षेत्रका खेलाडी छन्। मार्की खेलाडी ऐरीसहित विनोद भण्डारी, नरेश बुढाएर, नरेन साउद, खड्ग बोहरा र भोजराज भट्ट सुदूरपश्चिम क्षेत्रका हुन्। यस्तै बलर अविनाश बोहरा भने कर्णाली प्रदेशका हुन्। यसबाहेक आरिफ शेख पर्सा, अर्जनु कुमाल गुल्मी, इशान पाण्डे र अमित श्रेष्ठ काठमाडौँका खेलाडी छन्। ऐरी, आरिफ अविनाश बोहरा, विनोद भण्डारी, इशान पाण्डे, नरेश बुढाएरले भने राष्ट्रिय टोलीबाट नेपालको प्रतिनिधित्व गर्दै विभिन्न अन्तर्राष्ट्रिय प्रतियोगिता खेसिकेका छन्।

सुदूरपश्चिमले चार विदेशी खेलाडीलाई अनुबन्ध गरेको छ। चार विदेशी खेलाडीमध्ये तीनजना ब्याटिङ अलराउण्डर छन् भने एकजना बलिङ अलराउण्डर छन्। नेपालमा आएर अन्तर्राष्ट्रिय प्रतियोगिता खेलिसकेका संयुक्त अरब इमिरेट्स (युएई)का रोहन मुस्ताफा र स्कटल्याण्डका ब्राण्डन म्याकमुलेन छन्। त्यसैगरी इंग्ल्याण्डका सैफ अली जैब र चेन्नई सुपर किंग्सबाट आइपिएल खेलेका न्युजिल्याण्डका बलर स्कट कुगेलेइन सुदूरपश्चिम रोयल्समा आबद्ध छन्।

Advertisement 2

टोलीका दुई युवा खेलाडीले अर्जुन कुमाल र नरेन साउदले भने आफ्नो टोलीको उद्घाटन खेल गुमाउने छन्। उनीहरु नेपाली यु–१९ टोलीबाट एसिसी एसिया कप खेल्न युएई जाँदैछन्। सुदूरपश्चिम रोयल्सको मुख्य प्रशिक्षकमा राष्ट्रिय टोलीमा पनि प्रशिक्षकको भूमिका निर्वाह गरिसकेका जगत् टमाटा छन्। सुदूरपश्चिममा जन्मेका ६० वर्षीया टमाटाले आफ्नो टोलीले जीतका लागि खेल्ने बताए। नेपाली टोलीका सफल प्रशिक्षकका रुपमा परिचित उनले एनपिएलमा आफूले सहभागिता जनाउन पाउँदा खुसी लागेको बताउँदै आफ्नो टोलीले सय प्रतिशत दिएर खेल्ने उल्लेख गरे।

प्रशिक्षक टमाटाले आफ्नो टोलीको तयारी उल्लेख्य रहेको भन्दै सुदूरपश्चिम र नेपाली क्रिकेटलाई माया गर्न सबैलाई आग्रहसमेत गरे। यही नोभेम्बर २७ देखि ३० तारिखसम्म सबै विदेशी खेलाडी नेपाल आइपुग्ने उनले जानकारी दिए। टमाटासँग राष्टिय क्रिकेट टिम पुरुष, महिला सिनियर टोलीदेखि उमेर समूहको टोलीमा प्रशिक्षको भूमिका निर्वाह गरिसकेको अनुभव छ। सुदूरपश्चिम रोयल्सको ओनर भने एम्पायर स्पोर्टस् रहेको छ। त्यस्तै मेन्टरमा अष्टेलियका ब्राड हज छन्। उनी सोमबार नेपाल आइपुगेका छन्। टोलीको ब्राण्ड एम्बासडरमा भने ओलम्पियन खेलाडी दीपक विष्ट रहेका छन्।

नेपाल क्रिकेट संघ (क्यान) को आयोजनामा हुन लागेको उक्त नेपाल प्रिमियर लिग (एनपिएफ) हालसम्मकै सबैभन्दा ठूलो घरेलु प्रतियोगिता हो। प्रतियोगितामा सुदूरपश्चिम रोयल्ससँगै काठमाडौँ गोरर्खाज लुम्बिनी लायन्स, पोखरा एभेन्जर्स, चितवन राइनोज, विराटनगर किंग्स, जनकपुर बोल्ट्सल र कर्णाली याक्स गरी आठ टोली सहभागी छन्। प्रतियोगिताको उद्घाटन खेलमा शनिबार विराटनगर र जनकपुरबीच प्रतिस्पर्धा हुनेछ। त्यस्तै सुदूरपश्चिमले यही मङ्सिर १८ गते विराटनगर किंग्ससँग खेल्दै प्रतियोगिताको उद्घाटन गर्नेछ।

उक्त प्रतियोगिताका लागि नेपाल क्रिकेट संघ (क्यान) एनपिएलको उद्घाटन खेलमा साधारणतर्फ ३ सय रुपैयाँ र भिआइपीतर्फ ७ सय रुपैयाँ टिकट दर तोकेको छ। त्यसबाहेक अन्य एनपिएलको खेलका लागि साधारणतर्फ ३ सय रुपैयाँ र भिआइपीतर्फ ७ सय रुपैयाँ निर्धारण गरिएको छ। क्यानले प्लेअफका दिन साधारणतर्फ ५ सय रुपैयाँ तथा भिआइपीतर्फ ७ सय रुपैयाँटिकट दर तोकिएको जनाएको छ।

क्यानले एनपिएलको फाइनलमा भने साधारणतर्फ पाँच सय रुपैयाँ र भिआइपीतर्फ १ हजार रुपैयाँको टिकट निर्धारण गरेको छ। सिजनल टिकटसमेत खरिद गर्न सकिने व्यवस्था रहेको क्यानले जनाएको छ। त्यसका लागि साधारणतर्फ ४ हजार ४ सय ८० रुपैयाँ र भिआइपीतर्फ ८ हजार २ सय ४० रुपैयाँ निर्धारण गरिएको छ। एनपिएलको टिकट खल्ती एपबाट खरिद गर्न सकिनेछ।