मुलुकको प्रमुख प्रशासकीय केन्द्र सिंहदरबारभित्रै दुई दर्जन हाराहारी फष्ट क्लास अफिसरहरु बेरोजगार बनाइएको छ । जसमध्ये केही सहसचिवलाई झण्डै चार महिनादेखि जिम्मेवारविहिन बनाएर बरण्डामा थन्क्याइएको छ ।
गृहमा ६,अर्थमा ५,प्रधानमन्त्री तथा मन्त्रिपरिषद्को कार्यालयमा ४,संघीय मामिला तथा सामान्य प्रशासन मन्त्रालयमा २ जना सहसचिवहरु बरण्डामा थन्काइएकोमा हिजैमात्र अर्थका ५ सहसचिवलाई जिम्मेवारी पाएका छन् । अन्य सहसचिवको दैनिकी नै बनेको छ मन्त्रालय जाने हाजिर गर्ने फर्कने ।
प्रधानमन्त्री तथा मन्त्रिपरिषद्को कार्यालयका नारायण सापकोटा चार महिनादेखि जिम्मेवारी पाउन सकेका छैनन । राजश्व अनुसन्धान विभागबाट चार महिना अघि उनलाई प्रधानमन्त्री तथा मन्त्रिपरिषद्को कार्यालयमा जगेडामा तानेर त्यहाँ नवराज ढुङ्गनालाई खटाइएको थियो । त्यहाँ अहिले नवराज घिमिरे,किरण रुपाखेती जगेडामा थपिएका छन् । किरण र नवराज मुख्यसचिव बैकुण्ठ अर्यालकै रोजाईमा प्रधानमन्त्री तथा मन्त्रिपरिषद्को कार्यालयमा पुगेका हुन भनिँदैछ । अर्थमन्त्री प्रकाश शरण महतलाई आफ्ना कार्यकर्ता फिट गर्न परेपछि मध्यमस्तरीय करदाता कार्यालयबाट अर्थमा तानिएका ढुण्डी निरौला अहिले प्रधानमन्त्री तथा मन्त्रिपरिषद् कार्यालयको कौसीमा पुगेर बेकामे बनाइएको छ । यस अघि निरौलालाई चार महिनासम्म गृहमा जिम्मेवारविहिन बनाएर राखिएको थियो । त्यही नियती दोहोरिने स्थिति छ ।

Advertisement 1

उता अर्थमा पाँच सहसचिवमध्ये राजेश्वर ज्ञवालीलाई चार महिनाभन्दा लामो समयदेखि जगेडामा थन्काइएकोमा हिजोमात्र उनले महालेखा नियन्त्रकको कार्यालयमा जिम्मेवारी पाएका छन् । त्यहाँका शम्भु मरासिनीको ठाउँमा ज्ञवालीलाई खटाइएको छ ।कर्मचारी प्रशासन हेर्दै आएका आनन्द काफ्ले गृहमा पुगेसँगै सो ठाउँमा महेश आचार्यलाई दिइएको छ । महालेखा नियन्त्रकको कार्यालयमा कार्यरत शम्भु प्रसाद मरासिनीलाई भन्सार जाँच पास परीक्षण कार्यालयको प्रमुख भन्सार परीक्षण प्रशासकमा रुपमा खटाइएको छ । यस्तै सहसचिव महेश बराललाई कर प्रणाली सुधार सम्बन्धी उच्चस्तरीय सुझाव समितिको जिम्मेवारी दिइएको छ । अमृत लम्साललाई मध्यमस्तरीय करदाता कार्यालय, बबरमहलको प्रमुख कर प्रशासकमा पठाइएको पठाइएको छ ।

संस्थान समन्वय महाशाखा हेर्दै आइरहेका भुपाल वराल आन्तरिक राजश्व विभागको महानिर्देशकको जिम्मेवारी खोजिरहेका भए पनि दीर्घराज मैनालीलाई हटाउन सकिएको छैन । मैनाली लामो समयदेखि राजश्वको प्रमुखको भूमिकामा छन् । केही ठूला व्यापारीले च्यापेका कारण उनलाई त्यहाँबाट हल्लाउन नसकिएको हो भन्छ अर्थ मन्त्रालय ।
उता गृहमै ६ उपसचिव बरण्डामा थन्काइएको छ । अख्तियारबाट गृह प्रवेश गरेका भोला दाहाल, प्रेम प्रसाद भट्टराई, आनन्द काफ्ले, भरत खनाल, स्किम श्रेष्ठ र नारायण प्रसाद अर्यालको दैनिकी हाजिर गर्ने र फर्कनेमा सीमित पारिएको छ । फष्ट क्लास अफिसरहरुले हाक्ने झापा, सुनसरी, सिन्धुपाल्चोक, तनहुँ र प्यूठान लगायतका जिल्ला प्रमुख जिल्ला अधिकारीविहिन छन्,दुई साता बढी भयो ।अध्यागमन विभागबाट सामान्य प्रशासनको बरण्डामा छन्,झलकराम अधिकारी । पाँच महिना पुग्न लाग्यो । यस्तै नीता पोखरेल पनि सामान्यको बरण्डामा छिन् ।

Advertisement 2

अघिल्लो आर्थिक बर्षमा मात्र कर्मचारीहरुलाई अतिरिक्त समूहमै राखेर १० करोड ५२ लाख रकम तलब खुवाइएको थियो ।