संघीय मामिला तथा सामान्य प्रशासनमन्त्री अमन लाल मोदीले सुशासनको शुरुवात सामान्य प्रशासन मन्त्रालयबाटै हुनुपर्ने हुँदा अहिले आफूहरु त्यही अभियानमा लागेको बताएका छन् ।
उनले आफू मन्त्री भएदेखि नै सुशासन कायम गर्ने सिलसिलामा कठोर भएर लागेको उल्लेख गर्दै सिंहदरबारमा डेरा जमाएर बसेका कर्मचारीलाई स्थानीय तहमा सरुवा प्रारम्भ गरिएको बताए । सरुवामा कसैप्रति आग्रह र पूर्वाग्रह नराखिएको पनि मन्त्री मोदीले प्रष्ट पारेका छन् । भन्छन्, कसैप्रति म आग्रह र पूर्वाग्रह बोकेर हिड्ने मान्छे म होइन । देश र जनताप्रति उत्तरदायी र हित सोचेर काम गर्न आवश्यक छ । सुशासन कायम गर्ने कुराको सुरुवात सामान्य प्रशासन मन्त्रालयबाट हुनुपर्छ । हामी यही अभियानमा छौँ ।”
यस्तै उनले सरुवा भइसकेकाहरुले रमाना नलिए वा रमाना नदिएको खण्डमा कारबाही हुने चेतावनी पनि दिएका छन् ।
अर्काे प्रंसगमा लम्बेतान निर्णय प्रक्रियाले देश नबन्ने भन्दै दुखेसो पनि पोखे । मन्त्रालयले आयोजना गरेको आर्थिक वर्ष २०७९/८० को वार्षिक प्रगति समीक्षा एवम् मन्त्रालयस्तरीय विकास समस्या समाधान समितिको बैठकलाई सम्बोधन गर्दै मन्त्री मोदीले यस्तो दुखेसो पोखेका हुन ।

Advertisement 1

नियर्णयका लागि अपनाइने लम्बेतान प्रक्रियाभन्दा देशले नतिजा खोजिरहेको मन्त्री मोदीको भनाई थियो । उनले थपे, “एउटा ऐन बनाउन वर्षौवर्ष लाग्ने हाम्रो लम्बेतान निर्णय प्रक्रिया छ । यस्तो लम्बेतान प्रक्रियाले हुँदैन । जनतालाई लम्बेतान प्रक्रिया होइन, नतिजा चाहिएको छ ।”

राष्ट्रिय निजामती सेवा ऐन ल्याउने प्रक्रियामा भइरहेको लम्बेतान निर्णय प्रक्रियाको उदाहरण दिँदै उनले भने, “मन्त्रालयले ऐन बनाएपछि कानुन र अर्थमा सहमतिका लागि पठाउने, सहमति प्राप्त भएपछि समितिमा पठाउने, त्यसपछि मन्त्रिपरिषद्मा पठाउने अनि संसदमा लैजाने । यस्तो लम्बेतान प्रक्रियाले हामी चाडो नतिजा दिन नसक्ने ठाउँमा छौँ ।”

Advertisement 2

मन्त्री मोदीले कानुन व्यक्तिगत स्वार्थका लागि नभई देश र जनताको आवश्यकतालाई सम्बोधन गर्नका बनाउनुपर्ने धारणा समेत राखे ।