विशेष अदालतका बहुसंख्यक फैसला प्रतिवादीको पक्षमा आउन थालेपछि अख्तियार दुरुपयोग अनुसन्धान आयोगले सार्वजनिक रूपमै असन्तुष्टि जनाएको छ ।

Advertisement 1

टंगालस्थित रातो घर विशेषको फैसलाविरुद्ध सर्वोच्च अदालतमा पुनरावेदन गरेको छ । विशेष अदालतले तथ्य र प्रमाण अनदेखा गरेको, आरोपितको बयानलाई आधार बनाएको र भएका प्रमाण बेवास्ता गरेको अख्तियारको निष्कर्ष  निकालेको छ । अख्तियारले यस आर्थिक बर्षका पछिल्ला चार महिनासम्ममा  १ सय २४ फैसलाविरुद्ध पुनरावेदन दिएको जनाइएको छ ।

अख्तियार प्रवक्ता श्यामप्रसाद भण्डारीले विशेष अदालतले फैसला गरेका एक सय २२ वटा मुद्दामा चित्त नबुझेका कारण सर्वोच्चमा पुनरावेदनका लागि निवेदन दर्ता भएको जानकारी दिएका छन् ।

Advertisement 2

गत असारयता मात्रै अख्तियारले प्रतिवादीको पक्षमा भएका फैसला, कतिपय आरोपितलाई तथ्य प्रमाण हुँदाहुँदै आंशिक सजाय दिलाएका लगायत ४२ करोड १६ लाख २६ हजार ४ सय ६२ रुपैयाँ बिगो, बिगोबमोजिम जरिवाना र कैद सजाय मागदाबी गरिएका १ सय २४ मुद्दामा विशेषको फैसलाविरुद्ध सर्वोच्चमा पुनरावेदन दिएको छ ।

अख्तियारले चालू आर्थिक वर्षमा विशेषले एक सय ६३ वटा भ्रष्टाचार मुद्दामा फैसला गरेको उल्लेख गर्दै प्रवक्ता भण्डारीले अख्तियारले २० वटा मुद्दामा मात्रै सफलता पाएको जनाएको छ ।

पुनरावेदन गरिएको १२४ मुद्दाका २५१ प्रतिवादीविरुद्ध ४२ करोड १६ लाख २६ हजार ४६२ बिगो दाबी गरिएको छ ।राजश्व चुहावट, घूस, सामाजिक सुरक्षाभत्ता हिनामिना, गैरकानुनी सम्पत्ति आर्जन, प्रश्नपत्र गोपनीयता भंग, गलत प्रतिवेदन, झुट्टा बिल भरपाई, नक्कली बैंक ग्यारेन्टी, गुणस्तरीयहीन सामान खरिद लगायत आरोपका मुद्दामा विशेष अदालतबाट सफाइ पाएका उक्त मुद्दालाई पुनरावेदनका लागि आयोग सर्वोच्च अदालत गएको हो ।

उनले फैसला भएका १८ वटा मुद्दामा अख्तियारसँग पर्याप्त प्रमाण नपुग्ने भएकाले पुनरावेदन नगर्ने निर्णय भएको जिकिर गरेका छन् । साथै २४ वटा मुद्दामा पुनरावेदन जानेगरी काम गरिरहेको समेत जानकारी दिए ।

अघिल्लो आर्थिक वर्षका दुईवटा मुद्दामा पनि पुनरावेदन गरिएको उनको भनाइ छ । ती मुद्दाहरु विशेषगरी सामाजिक सुरक्षाभत्ताको हिनामिना र गैरकानूनी सम्पती आर्जनसँग सम्बन्धित हुन् ।