Advertisement 1

रारा राष्ट्रिय निकुञ्ज कार्यालयका पोष्टमा कार्यरत कर्मचारीहरूले गत वैशाखदेखि हाजिरै नगरी तलब लिएको पाइएको छ । गत १ वैशाखदेखि नयाँ हाजिरी प्रयोग आउने व्यवस्था भएसँगै निकुञ्जमा र यसअन्तर्गतका छ वटा निकुञ्ज सुरक्षार्थ स्थापना गरिएका पोष्टका कर्मचारीलाई बिनाहाजिर तलब प्रदान गरिएको भेटिएको हो ।

निकुञ्ज कार्यालयले चैतलगत्तै स्टोर तथा जिन्सी शाखाले नयाँ हाजिरी फाइलको व्यवस्था गरेर मातहतका सबै पोष्टमा पठाई सक्नुपर्ने थियो । तर तीन महिना बित्न लाग्दासमेत हाजिरी फाइलको व्यवस्था नहुँदा त्यहाँ कार्यरत कर्मचारीहरूको खातामा हाजिरी नगरी तलब जम्मा गरिएको पाइएको हो ।

Advertisement 2

मासिक हाजिरी प्रतिलिपी उतार गरी सम्बन्धित कार्यालयको प्रशासन शाखामार्फत कार्यालय प्रमुखले प्रमाणित गरेपछि मात्र लेखा शाखाले कार्यरत कर्मचारीहरूको हाजिरीअनुसार सम्बन्धित् कर्मचारीको खातामा मासिक पारिश्रमिक तथा अन्य सुविधाको रकम जम्मा गरिदिनुपर्ने प्रावधान छ । तर, रारा राष्ट्रिय निकुञ्जले हाजिरी बिनानै जेठसम्मको तलब कर्मचारीहरूलाई दिएको देखिएको हो ।

रारा राष्ट्रिय निकुञ्ज कार्यालय र मातहतका छ वटा पोष्टमा ५५ जना कर्मचारी कार्यरत छन् । उनीहरूले गत वैशाखदेखि आजसम्म हाजिर गर्न पाएका छैनन् । कार्यालयका संरक्षण अधिकृत बद्रीविनोद दाहालका अनुसार एक हप्ता अगाडि हाजिरी रजिष्ट्रार पठाइएको छ । आजसम्म ती हाजिरी रजिष्ट्रार सम्बन्धित कार्यालयमा पुग्ने उनको दाबी छ ।

हाजिरी उतारको प्रतिलिपी बिना कर्मचारीको खातामा रकम जम्मा गर्न सम्बन्धित निकायबाट आदेश भएअनुसार आफूले रकम जम्मा गरेको लेखापाल नरबहादुर डाँगीले बताए ।