आगामी वैशाख ३० मा हुन स्थानीय तहको निर्वाचनमा अधिकांश स्थानमा दुइपक्षीय केही स्थानमा त्रिपक्षीय प्रतिष्प्रर्धा हुँदैछ । पाँच पालिका रहेका रसुवा जिल्लाको उत्तरगया गाउँपालिकामा त्रिपक्षीय प्रतिष्प्रर्धा हुने भएको छ । जहाँ एमालेले केन्द्रीय सदस्य माधव अर्याललाई मैदानमा उतारेको छ भने काँग्रेसले उपेन्द्र लम्साललाई नै दोहोर्याएको छ । यस्तै माओवादी केन्द्रबाट मेघनाथ घिमिरे प्रभाकर चुनावी मैदानमा छन् । यसपटक उत्तरगया गाउँपालिकाको उपप्रमुखमा चमेली गुरुङ मैदानमा छिन्,एमालेबाट । ५ वटा वडा र ६ वटा निर्वाचन क्षेत्र रहेको सो पालिकाभित्र कुल मतदाता संख्या ८ हजार ३९२ रहेका छन् । ०७४ सालको स्थानीय तहको निर्वाचनमा १ हजार ८७८ मत सहित चुनाव जितेकी हुन उनले । काँग्रेसकी शैपकुमारी अधिकारी र उनीबीचको मतान्तार ५९३ रहेको थियो । एक कार्याकाल चलाइसकेको र जनताको हितमा प्रतिवद्ध रहेर काम गरेकै कारण उत्तरगयाबासीले पुन आफूलाई अमूल्य मतदान गरेर जिताउनेमा उनी विश्वस्थ छिन् ।

Advertisement 1

० एक कार्यकाल उपाध्यक्ष चलाइसक्नुभएको व्यक्ति फेरि उपाध्यक्षमै किन दोहरिन चाहनुभएको ?
राजनीतिमार्फत जनताको सेवा गर्ने चाहना हो । अहिलेको अवस्था, जनताको माग, गाउँबासीहरुले नै पुन दोहोरिन अपिल गरे । यस्का साथैं भूगोलबाट उठेका कुराहरुले गर्दा म पुन चुनावको मैदानमा आएको हो । म यहीँको स्थानीय,पालिकाभित्रका सबैका सुख–दुःखसँग परिचित छु । कामको लागि एक कार्यकालमा मनग्य अनुभव हासिल भएको छ । बिषम परिस्थितीको कारणले अघिल्लो कार्यकालमा केही काम पूरा हुन सकेनन,अधुरा रहे । तिनलाई पूरा गर्न पुन मेरो उपस्थिती हुन जरुरी देखें, पालिकाबासीले त्यो महसुस गर्नुभएको छ । गत पाँच वर्षमा हामीले गाउँबासीको भलाइका लागि धेरैवटा आयोजना बनायौं । ती आयोजनाहरु पूरा गर्नको लागि म यसपटक दोहोरिनै पर्ने जनताहरुको बुझाइको कारणले म पुन उपाध्यक्षको रुपमा चुनावी मैदानमा होमिएको हुँ ।
० तपाईले अघिल्लो ५ बर्षे कार्यकाल कस्तो रह्यो ?
मेरो कार्यकाल असाध्यै कामकाजी, महत्वपूर्ण उपलब्धीपुर्ण भएको छ । हामी निर्वाचित भएर आउँदा गाउँपालिका पुर्णतया नयाँ संरचना थियो । पहिला त हामी कसरी काम गर्ने भन्ने नीतिगत समस्या थियो र हामीले पहिलो प्रथामिकतामा नीति कार्यक्रम, ऐनलगायतका कार्यविधिहरु तत्काल गाउँसभाबाट निर्माण गरेर कामको प्रारम्भ ग¥र्यौ । शुरुमा नीति, नियम र ऐन कानून नै थिएन । यसको समस्या थियो । त्यस्तै संस्थागत क्षमता विकास गर्ने काम र जनशक्ति अभावलाई पूरा गर्न हामी सुरुका वर्षहरुमा लागेका थियौं । हामी धेरै चुनौतीकाबीच निर्वाचित भएका थियौं । हामीसँग कार्यालय सञ्चालन गर्ने भौतिक संरचना नै थिएन । हामीले माथिल्लो निकाय र हामी आफैंले पहल गरेर विस्तारै यी र यस्ता समस्याहरु हल गर्दै गयौं । समग्रमा भन्नु पर्दा बितेका पाँच वर्षे कार्यकाल अत्यन्तै उत्साहप्रद, उपलब्धीमूलक र ऐतिहासिक रह्यो । हाम्रो कार्यकाल पूर्णरुपमा सफल भएको छ । गाउँ गाउँमा सिंहदरबार भनेपछि जनताले हामीसँग धेरै अपेक्षा गरेका थिए । चुनावका क्रममा जाँदा पनि जनताले हामीसँग धेरै माग गरेका थिए । ती सबैलाई सम्बोधन गरेर जानुपर्ने थियो । हामी असफल पनि हुन सक्थ्यौं, तर हामी सबै चुनौतीलाई सामना गरेर अघि बढेकाले हामी सफल भएका हौं ।
० तपाईले पहिलो कार्यकाल चुनावमा गरेको प्रतिबद्धता कति पूरा भए ?
अघिल्लो निर्वाचनका क्रममा जनतासँग गरेका धेरै प्रतिवद्धता पूरा भएका छन् । विविध कारणले केही प्रतिवद्धता पूरा गर्न सकेनौं । पहिलो बर्ष हाम्रो पहिलो अनुभव भएको कारणले सिक्दा नै गयो दोस्रो बर्ष धेरै काम भयो तर पछिल्लो समय कोरोनाको कारणले गर्दा कोरोनासँग जुद्धैमा समय गयो यद्यपि पूर्वाधारको क्षेत्रमा धेरै प्रगति भएको छ । अहिले बस्ती बस्तीमा सडक पुगेको छ । हामी आउँदा जनता पालमुनि थिए, भुकम्बाट लडेका घरहरु अहिले पुननिर्माण सम्पन्न भएका छन् । अस्थायी टहरोबाट स्थायी छानोमुनि ल्याउनुपर्ने प्रमुख चुनौती थियो । विद्यालय भवनहरु सबै ढलेका थिए, अहिले सबै निर्माण सम्पन्न भइसकेका छन् । स्वास्थ्यका भवनहरु केही निर्माण सम्पन्न भएका छन् । खानेपानी, सिञ्चाइँलगायत भौतिक शीर्षकमा धेरै कामहरु यो ५ वर्षमा भएका छन् । जनतालाई दैनिक आवश्यक पर्ने सेवालाई चुस्त र दुरुस्त बनाउनका लागि हामीले धेरै मेहनत गरेका छौ । सकेसम्म जनतालाई दुःख नहोस् भनेर हामीले ध्यनपूर्वक काम गरेका थियौं । यो संरचना सामूहिकरुपमा चल्ने हो । मैले व्यक्तिगत रुपमा मात्रै चलाउने होइन । म यो कुर्सीमा बस्दै गर्दा यति सफल भइन्छ होला भनेर सोचेको पनि थिइनँ । तर अहिले फर्केर हेर्दा हाम्रो कार्यकाल ऐतिहासिक रुपमा सफल भएको छ ।
० तपाईको पालिकाका ५ वटै वडामा लालझण्डा फहराउनका लागि तपाई र तपाईका पार्टीसँग के कस्ता चुनावी एजेण्डा छन् ?
शिक्षा, स्वास्थ्यलाई पहिलो प्राथमिकता दिनु पर्ने छ । सडकलाई कालोपत्रे गर्नु पर्ने रहेको छ । हामीले शिक्षा क्षेत्रमा आमुल परिर्वतन गर्नु पर्ने अवस्था रहेको छ । म यसै क्षेत्रबाट प्रतिनिधित्व गर्ने भएको हुनाले यसमा धेरै सुधार गर्नु पर्ने अवस्था रहेको छ । यस्तै विभिन्न कुराहरुको सुधारको लागि हामी अहिले घर दैलो अभियानमा लागि रहेका छौं ।
० अघिल्लो पटक अध्यक्ष काँग्रेसले जितेको पालिका हो त्यो । सो पालिकाबाट चुनाव जित्ने आधारहरु के के देख्नुहुन्छ ?
धेरैले बुझेको कुरा हो, सबैलाई थाहा भएको कुरा हो एमालेको टिमले गर्न खोजेको कुरा काग्रेसका अध्यक्षले गर्न नदिएको कुरा । फरक पार्टीका अध्यक्ष भएर भनेको होइन् उहाँको गतिबिधी, जनताहरुलाई सेवा गर्नु पर्ने कमी कमजोरी बारेमा सवै छर्लङ्ग छन् । जनताको सेवा सुविधा दिने कुरामा उहाँको रुची नहुने तर उहाँलाई सेलिब्रेटी बन्न खोज्ने, पालिका वा गाउँमा नबस्ने तर बढी समय काठमाण्डौमा रमाउने उहाँको स्वभाव हो । उत्तरगयाँ र रसुवाबासीलाई थाहा छ उहाँ अध्यक्ष भएर के कति काम गर्नु भयो र म उपाध्यक्ष भएर के कती काम गरेँ । जनताका सेवामा के कति खटिँए । समस्याहरुको के कती समाधान गरेँ सबै रसुवालीलाई थाहा छ ।
० तपाई त्यही पालिकामा बर्षाैदेखि भिज्नुभएको नेतृ । जनतामाझ जाँदा के कस्ता प्रतिक्रिया पाउनुभएको छ ?
अहिले मैले पालिकाको ५ वटै वडाहरुमा पुगिसकेको छु । अहिले पनि घरदैलो अभियानमा हामी १ नंम्बर र २ नंमबर जादाँ भोट हाल्ने जनताहरु धेरै नै उत्साहित भएको देखिन्छ । उनीहरु नेकपा एमालेको कामको कारणले एमालेलाई भोट हाल्नको लागि उत्साहित भएको देखिन्छ ।
० तपाईका आफ्ना मतदाताहरुलाई के भन्न चाहनुहुन्छ ?
५ बर्षको यो कार्यकालमा  एक दिन पनि जनताको हित विपरीत काम गरिन । जनता प्रति उत्तरदायी भएर काम गरेँ । पार्टीको शिर निहुराउने काम कहिल्यै गरिन र गर्ने पनि छैन । मैले पहिलो कार्यकालमा गर्न नसकेका अधुरा कामहरु गर्नको लागि फेरी सूर्य चिन्हमा मतदान गरी अध्यक्ष माधव अर्याल,उपाध्यक्ष मसहित हाम्रो टिमलाई बिजयी गराइदिनुहुन उत्तरगयाबासीलाई अनुरोध गर्दछु ।