आरुबारीमा पहिरो नियन्त्रण गर्न उपभोक्ता समितिको डोजर
स्थानीयवासीलाई रोजगारी सृजना गर्ने र आयोजनाप्रति उनीहरुको स्वामित्व बढाउने उद्देश्यले उपभोक्ता समितिको अवधारणा अघि सारिए पनि यसको प्रयोगमा विकृति बढ्दै गएको छ ।
Advertisement 1
गोकर्णेश्वर नगरपालिका–९ आरुबारीमा अरुणोदय माध्यमिक विद्यालयको नयाँ भवन पानीखोल्चा पहिराको जोखिममा परेपछि बागमती प्रदेश सरकारले चालु आर्थिक वर्षमा करिब रु ४० लाख बजेट विनियोजन गर्यो । प्रदेशको भौतिक पूर्वाधार विकास मन्त्रालयले बजेट विनियोजन गरेको थियो । हाल प्रदेश सरकारले यो मन्त्रालय फुटाएर बनाएको खानेपानी, ऊर्जा तथा सिँचाइ मन्त्रालयअन्तर्गतको जलस्रोत तथा सिँचाइ डिभिजन कार्यालय बसुन्धराले आयोजना कार्यान्वयनका लागि उपभोक्ता समिति गठन गरेको छ ।
पहिरा नियन्त्रणका लागि सञ्चालित आयोजनामा समितिले डोजर चलाएको छ । पहिराको भिरतर्फ डोजर लगाउँदा पनि आयोजनास्थलमा प्राविधिक भने भेटिएनन् । आयोजनामा भेटिनुभएका पानीखोल्चा पहिरा नियन्त्रण उपभोक्ता समितिका सदस्य पासाङ लामाले भने डिभिजन कार्यालय, नगरपालिका र वडाकासमेत प्राविधिकले बैठक गरेर भनेअनुसार नै डोजर चलाएको जानकारी दिए ।
Advertisement 2
आयोजना स्थलमा प्राविधिक नभेटिने मात्र होइन, कानुनबमोजिम जानकारी दिन राखिनुपर्ने सूचनापाटीसमेत छैन । समितिका अध्यक्ष नरबहादुर गुरुङले छिटो गर्न पहिरो नियन्त्रणका लागि डोजर चलाएको बताए । वडा कार्यालयको समन्वयमा उपभोक्ता समिति गठन गरिएको उनले जानकारी दिए । पहिरासँगै मेलम्ची खानेपानी आयोजनाको पानी ट्याङ्की छ । डोजरले पहिरा नियन्त्रणको काम गर्दा खानेपानी ट्याङ्कीमा पर्न सक्ने जोखिमबारे कुनै अध्ययन भएको छैन ।
डिभिजन कार्यालयका प्रमुख यादव सिग्देलले पहिरा नियन्त्रणका लागि डोजर चलाउँदा खानेपानीको ट्याङ्कीलाई असर नगर्ने दाबी गरे । पहिराले अरुणोदय माध्यमिक विद्यालयका लागि गर्न सक्ने प्रभाव रोक्नमात्र आयोजना सञ्चालन गरिएको उनले सुनाए । विद्यालय भवनमा सिभिल इञ्जिनीयरिङको कक्षा ९ देखि १२ सम्मको अध्ययन अध्यापन हुन्छ । नगरपालिका–९ का अध्यक्ष राजीव थापाले पहिरा नियन्त्रणका लागि डिभिजन कार्यालयसँगै नगरपालिकाले पनि नगरस्तरीय योजनाअन्तर्गत रु २५ लाख बजेट छुट्याएको बताए । नगरपालिकाको बजेटले भने काम सुरु नभएको उनको भनाइ छ । डिभिजनको बजेटको काम सकिएपछि नगरपालिकाको बजेटले काम गरिने जनाइएको छ ।
