राष्ट्रपति विद्यादेवी भण्डारीले राजनीतिक दलसम्बन्धी (दोस्रो संशोधन) अध्यादेश जारी गरेसँगै एमालेका माधव कुमार नेपाल समूहलाई नयाँ पार्टी गठन गर्ने बाटो खुलेको छ ।

Advertisement 1

माधव समूहले आफ्नो पार्टीको नामको अगाडि नेकपा र कोष्ठकमा (समाजवादी), (क्रान्तिकारी) या अन्य केही राख्ने तयारी गरेको छ । साथै चुनाव चिन्ह कलम प्रस्ताव गर्ने तयारी भएको नेताहरूको भनाइ छ । त्यस्तै नयाँ पार्टीको सांगठनिक संरचनामा तत्काल अध्यक्ष र महासचिवसहित केन्द्रीय सदस्य राख्ने सहमति पनि भैसकेको छ । बुधबार राष्ट्रपति विद्यादेवी भण्डारीले राजनीतिक दल सम्बन्धी अध्यादेश जारी गरेसँगै एमालेको नेपाल पक्ष नयाँ पार्टी दर्ताको प्रक्रियामा अघि बढेको छ।

नेपाल पक्षका नेताहरू अहिले बानेश्वरस्थित अर्याल होटलमा भेला भएका छन्। जहाँ नेपाल पक्षका सांसद र केन्द्रीय सदस्यहरू छलफलमा छन्। तर, नेकपा एमालेमा रहँदा नेता नेपाललाई साथ दिएका भीम रावल, गोकर्ण विष्ट र योगेश भट्टराई नेपालको नयाँ पार्टीमा सहभागी नहुने भएका हुन्।

Advertisement 2

एमाले अध्यक्ष केपी शर्मा ओलीसँग विवाद भएका बेला रावल, विष्ट र भट्टराईले खुलेरै नेपाललाई सहयोग गरेका थिए। तर प्रतिनिधि सभा दोस्रो पटक पुनःस्थापना भएर प्रधानमन्त्री शेरबहादुर देउवाले विश्वासको मत लिने दिन रावलले प्रतिनिधि सभा सदस्यबाट राजीनामा दिएका थिए।