खोजी अभियान :४ दिनमा २ सय २६ जना पक्राउ
काठमाडौं। नेपाल प्रहरीले गुण्डागर्दी, बिचौलिया, अभद्र व्यवहारलगायतका गैरकानुनी कार्यविरुद्ध विभिन्न स्थानमा सञ्चालन गरेको खोजी अभियानका क्रममा ४ दिनमै २ सय २६ जना पक्राउ गरेको छ।
Advertisement 1
केन्द्रीय प्रहरी प्रवक्ता प्रहरी नायब महानिरीक्षक अविनारायण काफ्लेले यही चैत १८, १९, २० र २१ गतेको अभियान अन्तर्गत २ सय २६ जनालाई पक्राउ गरी कानुनी कारबाही प्रक्रिया थालिएको जानकारी दिए।
प्रहरी प्रधान कार्यालयले सार्वजनिक गरेको विवरणअनुसार १८ गते काठमाडौँ उपत्यकाबाट ५१ जना, कोशी प्रदेशबाट १८ जना, १९ गते कोशीबाट १, मधेस प्रदेशबाट सात, बागमतीबाट २३, गण्डकीबाट २ र कर्णालीबाट ११ जना पक्राउ परेका थिए।
Advertisement 2
यस्तै २० गते मधेस प्रदेशबाट आठ, गण्डकीबाट १०, लुम्बिनीबाट ४ र सुदूरपश्चिम प्रदेशबाट २ तथा २१ गते काठमाडौँ उपत्यकाबाट ६२ जना पक्राउ परेका छन्।
प्रहरीका अनुसार पक्राउ पर्नेमा गुण्डागर्दी, बिचौलिया, यातायात तथा मालपोत कार्यालयमा दुःख र हैरानी दिने, सार्वजनिकस्थलमा अभद्र व्यवहार गर्नेलगायतका व्यक्तिहरू छन्। प्रवक्ता काफ्लेले अभियान जारी रहने बताएका छन्।
–––
