महिला टी–२० विश्वकप ग्लोबल छनोटः नेपाल स्कटल्यान्डसँग पराजित
काठमाडौं। आइसिसी महिला टी–२० विश्वकप ग्लोबल छनोटमा नेपाल स्कटल्यान्डसँग पराजित हुँदै प्रतियोगिताको समूह चरणबाटै बाहिरिएको छ। र्कीतिपुरस्थित त्रिवि क्रिकेट रङ्गशालामा आज भएको समूह चरणको अन्तिम खेलमा नेपाल स्कटल्यान्डसँग ७२ रनले पराजित हुँदै प्रतियोगिताबाट बहिरिएको हो।
Advertisement 1
जितका लागि १४१ रनको लक्ष्य पछ्याएको नेपालले १३ दशमलव पाँच ओभरमा सबै विकेट गुमाउँदै ६८ रनमा समेटियो। नेपालका लागि रोमा थापाले अविजित १४ रन बनाइन्।
त्यस्तै विन्दु रावलले १४ तथा रुविना क्षेत्रीले १० रन बनाउनुबाहेक अन्य ब्याटरले दोहोरो अङ्कमा रन जोड्न सकेनन्।
Advertisement 2
स्कटल्यान्डका लागि अब्ताहा मकसुदले सर्वाधिक तीन विकेट लिइन्। त्यस्तै क्याथरिन फ्रेजर र कप्तान क्याथरिन ब्राइसले समान २–२ विकेट लिए। यसैगरी राहेल स्लेटर र ओलिभिया बेलले समान १ १ विकेट लिए।
त्यसअघि टस हारेर पहिला ब्याटिङको निम्तो पाएको स्कटल्यान्डले निर्धारित २० ओभरमा सबै विकेट गुमाउँदै १४० रनको योगफल बनाएको थियो। स्कटल्यान्डका लागि प्रियनाज चटर्जीले सर्वाधिक ४५ रनको योगदान दिइन् भने एल्सा लिस्टरले २२, सारा ब्राइसले १८, मेगन म्याककोलले १७ तथा राहेल स्लेटरले ११ रन बनाए।
Advertisement 3
नेपालका लागि मनिषा उपध्यायले सर्वाधिक चार विकेट लिइन् भने रुविना क्षेत्रीले ३ विकेट लिइन्। त्यस्तै रिया शर्मा, सीता रानामगर र कविता जोशीले समान १–१ विकेट लिए। यस हारसँगै चार खेल खेलेको नेपालले एकमा जित तथा बाँकी खेलमा पराजय भोग्यो। २ अङ्क जोडेको नेपाल समूह ‘बी’ को चौथो स्थानमा रह्यो। जित निकालेको स्कटल्यान्डले भने समान खेलबाट ४ अङ्कका साथ सुपर सिक्सको यात्रा तय गरेको छ।
