काठमाडौं। लक्ष्यअनुसार राजस्व संकलनका लागि काम गर्न अर्थमन्त्री विष्णु पौडेलले कर्मचारीलाई निर्देशन दिएका छन्। गत आर्थिक वर्ष २०८०/८१को राजस्व संकलनको समीक्षा गर्न सोमबार अर्थ मन्त्रालयमा आयोजित कार्यक्रममा मन्त्री पौडेलले कर्मचारीलाई उक्त निर्देशन दिएका हुन्।

Advertisement 1

संसदले अनुमोदन गरेको राजस्व संकलनको लक्ष्य पूरा गर्नुको विकल्प नरहेको मन्त्री पौडेलले बताए। ‘राजस्व परिचालनका हिसाबले संक्रमण अवस्थामा छौं,’ उनले भने, ‘चलनचल्तीका हिसाबले अघि बढ्दा लक्ष्य प्राप्त गर्न सक्दैन चलनचल्तीको अभ्यासबाट माथि उठौं। कमीकमजोरीको स्वमूल्यांकन गरौं। चुहावटलाई नियन्त्रण गरौं। राजस्व परिचालनमा कमजोरी हुन नदिऔं।’

सरकारले चालू आर्थिक वर्ष २०८१/८२ मा १४ खर्ब १९ अर्ब रुपैयाँ राजस्व संकलन गर्ने लक्ष्य लिएको छ। सो राजस्व संकलनका लागि उद्योगी व्यवसायी र करदातालाई मैत्रीपूर्ण व्यवहार गर्न मन्त्री पौडेलले कर्मचारीलाई निर्देशन दिए।