अर्थ सचिवको जिम्मेवारी कृष्णहरि पुष्करले सम्हालेका छन् । अघिल्लो साताको क्याविनेटले प्रधानमन्त्री तथा मन्त्रिपरिषद्को कार्यालयबाट अर्थ सचिवमा सरुवा भएका पुष्करले आजदेखि जिम्मेवारी सम्हालेका हुन ।
सामान्यबाट गृह ताकिरहेका पुष्करले गृह नपाएपछि अर्थ मन्त्रालयमा जम्प गर्न सफल भएका छन् । उनी १४ महिनामै अर्थमा फर्कन सफल भएका हुन ।चार महिनामै अर्थ सचिव अर्जुन पोखरेललाई अर्थबाट प्रधानमन्त्री तथा मन्त्रिपरिषद्को कार्यालयमा पठाएर पुष्करलाई सचिवको रुपमा अर्थमा भित्र्याइएको हो ।

Advertisement 1

सहसचिवबाट सचिवमा बढूवा हुँदा प्रदेशमा नगई सिधै राजश्व सचिव हुँदै अर्थ मन्त्रालयको जिम्मेवारी पाएका पुष्कर १४ महिना पछाडि पूरानै मन्त्रालयमा फर्किएका हुन ।

राजश्वको दर हेरफेर भएपछि विवादमा परेर मधुकुमार मरासिनी सरुवा भएपछि राजश्वबाट अर्थमा प्रवेश पाएका पुष्कर १४ महिना पछि फेरि अर्थमै फर्कन सफल भएका हुन ।

Advertisement 2

पछिल्लो समय अर्थ मन्त्रालयका सचिवहरु चार महिनामै सरुवा हुन थालेका छन् । पोखरेलभन्दा अगाडि अर्थसचिव रहेका तोयम रायलाई पनि चार महिनामै त्यहाँबाट सरुवामा परेका थिए ।
त्यस अघिका अर्थ सचिवको जिम्मेवारीमा थिए कृष्णहरि पुष्कर । उनी अघिका अर्थसचिव मधुकुमार मरासिनी सिसि फुटेज काण्डको विवादमा परेर सरुवामा परेका थिए । १४ महिना राजश्व सचिव हुँदै अर्थ सचिवको भूमिकामा पुगेका पुष्कर फेरि कुनै शक्तिको बलमा अर्थ मन्त्रालयमै पुगेको चर्चा प्रशासनिक वृत्तमा व्यापक छ ।

५ महिना सामान्य प्रशासन सचिव हुँदा कर्मचारी परिचालनमा गरेको बदमासीका कारण तत्कालीन मन्त्री अमनलाल मोदीसँग पानी बाराबारको स्थिती थियो । उनै पुष्कर सामान्यबाट फर्किएर प्रधानमन्त्री कार्यालयमा गरी चाँजोपाँचो मिलाइसकेको इकर्मचारी डटकमले साता दिन अगाडि प्रकाशन गरिसकेको थियो । हालका अर्थ सचिव अर्जुन प्रसाद पोखरेललाई प्रधानमन्त्री तथा मन्त्रिपरिषद्को कार्यालयमा पठाएर उनी अर्थमा पुन दोहोरिन सफल भएका हुन ।

बेलायत भ्रमणबाट फर्किए लगतै नियुक्ति पत्र लिएका उनी आजदेखि अर्थ सचिवका रुपमा जिम्मेवारी सम्हाल्न पुगेका हुन । २०५३ सालमा निजामती सेवामा प्रवेश गरेका पुष्कर उद्योग, वाणिज्य तथा आपूर्ति मन्त्रालय,केही जिल्लाका प्रमुख जिल्ला अधिकारी, श्रम तथा वैदेशिक रोजगार विभागको महानिर्देशक भएर काम गरेका थिए ।

पुष्कर लोकमानकै कृपाले अख्तियार हुँदै कलकत्ताको महाबाणिज्यदूत नियुक्ति हुने अवसर समेत पाएका थिए ।पुष्करको अर्थमा इन्ट्रीसँगै अर्थ मन्त्रालयले अर्थका केही सहसचिवहरुका जिम्मेवारी हेरफेरको तयारी गरिरहेको छ ।

यता अर्थसचिव डा कृष्णहरी पुस्करले अहिले मुलुकको अर्थतन्त्रमा देखिएको समस्या समाधानका लागि कर्मचारी संयन्त्रबाट अधिकतम प्रयास आवश्यक रहेको बताएका छन् । उनले मन्त्रालयमा अर्थतन्त्रमा देखिएका चुनौती समाधान सकिने विश्वास व्यक्त गरे ।