संघीय मामिला तथा सामान्य प्रशासन मन्त्री अमनलाल मोदीले आफूलाई सरकारबाट फिर्ता बोलाइन्छ भन्नेमा विश्वास नलागेको प्रतिक्रिया दिएका छन् ।
जनमत पार्टीलाई आजै सरकारमा भित्र्याउने तयारीमा प्रधानमन्त्री प्रचण्ड लागेका छन् । जनमतलाई सरकारमा भित्र्याउँदा एक जना माओवादीका मन्त्रीले पदबाट हट्नुपर्ने हुन्छ ।

Advertisement 1

सरकारमा अहिले माओवादीबाट उप्रधानमन्त्री एवं गृहमन्त्रीमा नारायणकाजी श्रेष्ठ, सञ्चारमा रेखा शर्मा, उर्जामा शक्ति बस्नेत, पर्यटनमा सुदन किराँती, संघीय मामिलामा अमनलाल मोदी र महिन्द्रराय यादव पनि माओवादी कोटाबाटै मन्त्री छन् । सुशीला सिर्पाली ठकुरी माओवादीबाटै पर्यटन राज्यमन्त्री छिन् ।

यी मध्ये कार्यसम्पादनमा सबैभन्दा कमजोर देखिएका मन्त्रीलाई फिर्ता बोलाइने माओवादीको उक्त स्रोतले जनाएको छ । सम्भवत पर्यटन मन्त्री सुदन किराती वा अमनलाल मोदीमध्ये एक जनालाई फिर्ता बोलाएर जनमतकी अनिता साहलाई मन्त्री बनाइने तयारी छ ।

Advertisement 2

प्रधानमन्त्री पुष्पकमल दाहाल ‘प्रचण्ड’ले माओवादीबाट एक जना मन्त्रीलाई फिर्ता बोलाएर अनितादेवीलाई आजै मन्त्री बनाउने तयारी गरिरहेको माओवादी स्रोतले जनाएको छ ।

आठ बर्षदेखि रुमल्लिरहेको संघीय निजामती कर्मचारी ऐन ल्याउन पहलकदमी लिँदै आएका मोदीले स्थानीय तहमा निमित्तको राज हटाउनेदेखि सुगम र काठमाडौंमा डेरा जमाएर बसेका कर्मचारीहरुलाई दुर्गममा सरुवा,दुर्गममा लामो समयदेखि काम गरिरहेका कर्मचारीहरुलाई सुगममा सरुवा गर्ने गरेर केही सुधारका यत्न गर्दै थिए । फलस्वरुप उनी पूर्व मन्त्री लालबाबु पण्डितझैं आँखाको तारो बन्न पुगेका छन्,कतिपय कर्मचारीको नजरमा ।
उनै मन्त्री मोदीको नाम हिटलिष्टमा परेको चर्चा पछि इकर्मचारी डटकमले मन्त्री मोदीलाई टेलिफोन सम्पर्क गर्दै प्रश्न सोध्यो तपाई मन्त्रीबाट हट्न लाग्नुभएको हो ? भ मन्त्री मोदीले आफूलाई सरकारबाट फिर्ता बोलाइन्छ भन्नेमा विश्वास नलागेको प्रतिक्रिया दिएका हुन ।

अहिले क्याविनेटका २२ र तीन जना राज्यमन्त्री समेत गरी २५ सदस्यीय मन्त्रिमण्डल रहेको छ । जहाँ १२ जना बाहुन समूदायबाट प्रतिनिधित्व गर्दैछन् । राज्यमन्त्रीसहित महिला ५,मधेसी समुदायको प्रतिनिधित्व गर्ने ५ जना रहेका छन् । २५ सदस्यीय क्याविनेटमा आदिवासी र जनजातीको संख्या ५ जना छ ।सिंगो क्याविनेटमा १ जना मात्र थारु सदस्य रहेको कारण पनि आफूलाई मन्त्री पदबाट प्रधानमन्त्री तथा पार्टी अध्यक्ष प्रचण्डले व्याक गराउनु हुन्न भन्नेमा अमनलाल मोदी विश्वस्थ छन् ।

गणतन्त्र नेपाल र समावेशीताको मुद्धाको उठान नै प्रचण्डले गर्नुभएको र उक्त नारा संस्थागत हुँदै गएको उल्लेख गर्दै प्रधानमन्त्री तथा पार्टी अध्यक्ष प्रचण्डले आफ्नो सरकारमा रहेको एक जना मात्र थारुलाई हटाउनु होला भन्नेमा आफूलाई विश्वास नभएको प्रतिक्रिया दिएका हुन ।

प्रधानमन्त्री तथा पार्टी अध्यक्षप्रति अमनलालको यो विश्वाश रहे पनि कतिपयले भने संघीय मामिला तथा सामान्य प्रशासन मन्त्रालयको जिम्मेवारी सीता गुरुङलाई दिएर हितबहादुरलाई शहरी विकास मन्त्रालयको जिम्मा दिन लागिएको र जनमतकी अनिता साहलाई पर्यटनमा पठाउने तयारी भइरहेको बताएका छन् ।
यता पर्यटनमन्त्री सुदन किरातीले आफू मन्त्रीबाट फिर्ता हुन तयार रहेको बताएका छन् । उनले अध्यक्ष प्रचण्डलाई परेको बाध्यतामा आफूहरू सहयोग गर्न तयार रहेको बताएका हुन ।