दार्चुलामा विद्यालयमै पसेर विद्यार्थीलाई हातपात गर्ने एक जना अभिभावक पक्राउ परेका छन् । जिल्लाको शैल्यशिखर नगरपालिका–९ स्थित लटिनाथ मावि बस्कोटमा अध्ययनरत १४ वर्षीय आसुतोष साउँदलाई कुटपिट गर्ने बैतडीको डिलासैनी गाउँपालिका–६ घर भएका हरिश गिरीलाई प्रहरीले पक्राउ गरेको हो ।

Advertisement 1

असार ११ गते विद्यालयमा एउटै कक्षामा अध्ययनरत लेकम गाउँपालिका–१ खेताली घर भएका साउँद र १३ वर्षीय राजीव गिरीबीच सामान्य विवाद भएर झगडा भएको थियो । झगडा हुँदा दुवैको कापी च्यातिएको थियो । पक्राउ परेकामा हरिश राजीवका बुबा हुन् । विद्यार्थीबीचको झगडामा गएर हरिश गिरीले साउँदलाई विद्यार्थीको बीचमा लखेट्दै कुटपिट गरेका थिए ।

विद्यालयपारि कुमाली पुल नजिक गिरीको पसल छ । विद्यालयमा हाफ छुट्टी भएको वेला विद्यार्थीबीच सामान्य झगडा भएको थियो । खेल्ने बेला भएको झगडामा गिरीका बुबा हरिश आएर साउँदमाथि विद्यालय परिसरभित्रै कुटपिट गरेका हुन् । साउँदमाथि कुटपिट भइरहेको भिडियो सामाजिक सञ्जालमा भाइरल भएको छ ।

Advertisement 2

साना नाबालकमाथि विद्यालयमै कुटपिट भएको भन्दै साउँदका अभिभावकले मंगलबार इलाका प्रहरी कार्यालय गोकुलेश्वरमा जाहेरी दिएपछि आरोपितलाई पक्राउ गरिएको हो । उनीमाथि अभद्र व्यवहार गर्न नहुने अभियोग लगाएर अनुसन्धान भइरहेको छ । गिरीविरुद्ध अदालतबाट सात दिनको म्याद थप गरी अनुसन्धान प्रक्रिया अघि बढेको छ ।