संघीय मामिला तथा सामान्य प्रशासन मन्त्रालय एमालेले लिने मोटामोटी सहमती भएको छ ।

Advertisement 1

सत्ता साझेदार प्रमुख दल घटक नेकपा एमाले र माओवादी केन्द्रबीच मन्त्रालय बाँडफाँट हुँदा एमालेलाई सामान्य प्रशासन मन्त्रालय दिन लागिएको हो ।
एमालेका उपाध्यक्ष विष्णु पौडेलले उपप्रधान एवं अर्थमन्त्रीको जिम्मेवारी पाइसकेका छन् । एमालेका नेताहरू दामोदर भण्डारी, ज्वालाकुमारी शाह र राजेन्द्रकुमार राई पनि मन्त्रीमा नियुक्त भइसकेका छन् । बिनाविभागीय मन्त्रीका रूपमा शपथ लिएका उनीहरूको मन्त्रालय टुंगो लाग्न बाँकी छ ।
यस्तै एमालेबाट मन्त्री बन्ने चर्चामा रहेका सांसदहरुमा पृथ्वीसुब्बा गुरुङ, टोपबहादुर रायमाझी,एलपी साँवा, देवराज घिमिरे, छविलाल विश्वकर्माको नाम चर्चामा छ ।

हिजो भएको छलफलमा एमालेले जम्मा ८ मन्त्रालय पाउने सहमति भएको छ । उपप्रधानसहित अर्थ मन्त्रालय लिइसकेको एमालेले रक्षासहित, संस्कृति पर्यटन तथा नागरिक उड्डयन र संघीय मामिला तथा सामान्य प्रशासन मन्त्रालय लिने सहमति भएको छ । एमालेका ३ जना मन्त्री अहिले विनाविभागीय छन् ।

Advertisement 2

नेकपा माओवादी केन्द्रले भौतिक पूर्वाधार तथा यातायातसहित सञ्चार तथा सूचना प्रविधि र परराष्ट्र लगायतका मन्त्रालय पाउने भएको हो ।
यस्तै पूर्वराजा ज्ञानेन्द्र शाहको चाहना प्रतिकूल राष्ट्रिय प्रजातन्त्र पार्टी (राप्रपा) उपप्रधानसहित तीन मन्त्रालय लिएर सरकारमा सहभागी हुने भएको छ । लिङदेनकै नेतृत्वमा ३ मन्त्रालय लिएर सिंहदरबार छिर्ने तयारीमा लागेका छन् । उपप्रधान तथा उर्जासहित राजेन्द्र सरकारमा सहभागी हुन लागेका हुन ।

राप्रपाबाट मन्त्रीको दौडधुपमा रहेका विक्रम पाण्डेविरुद्ध अख्तियारले विशेष अदालतमा पुनरावेदन गर्ने तयारी छ । विशेषबाट भएको फैसलाको पूर्णपाठ प्राप्त हुनासाथ त्यसमा पुनरावेदन गर्ने सम्भावना देखिन्छ । पाण्डेमाथि सिक्टा सिँचाइ आयोजनामा अर्बौं रूपैयाँ भ्रष्टाचार गरेको आरोपमा अख्तियारले मुद्दा हालेको थियो । तर, विशेष अदालतले उनलाई उन्मुक्ति दिएपछि त्यसमा चित्त नबुझाएको अख्तियारले पुनरावेदन गर्न लागेको हो ।
यता राष्ट्रिय स्वतन्त्र पार्टीले श्रमसहित शहरी विकास मन्त्रालय मागेको छ ।

जसपाले कृषि मन्त्रालय पाउने सहमति छ ।