Advertisement 1

चितवन/माइती नेपाल चितवनको आयोजनामा हालै केही दिनअघि भरतपुरस्थित होटल ग्लोबल प्रा.लि. मा ‘चितवनमा बालबालिकाहरुको यौन शोषण र मानव बेचबिखन नियन्त्रणको वर्तमान अवस्था’ विषयक एक दिवसीय अन्तक्र्रिया कार्यक्रम आयोजना भएको थियो । कार्यक्रममा जिल्ला प्रहरी कार्यालय चितवनका प्रमुख प्रहरी उपरीक्षक नवराज अधिकारीले आफू माइती नेपालसँग धेरै पहिलेदेखि परिचित भएको बताउँदै चितवनमा माइती नेपालले गरेका जनमुखी कार्य देखेर खुसी लागेको बताए ।

अरु जिल्लामा भन्दा यो जिल्लामा हिंसामा परेका महिला तथा बालबालिकाहरुको सेवा गर्ने प्रतिस्पर्धा राम्रो रहेको प्रहरी उपरीक्षक अधिकारीले बताए । उनले चितवनमा बालबालिका तथा महिलामाथि हुने हिंसाका घट्ना तथ्यांकमा देखिने भन्दा धेरै नै भए तापनि कयौंले इज्जतको डरले बाहिर ल्याउन नचाहेको बताए ।
कार्यक्रममा निःशुल्क कानुनी सहायता केन्द्र चितवनकी अधिवक्ता गोमा न्यौपानेले माइती नेपाल चितवनसँग मिलेर धेरै मुद्दामा बहस गरेको बताइन् । उनले माइती नेपाल चितवनले धेरै बालबालिका तथा महिलाको उद्धार, संरक्षण र व्यवस्थापन गरेकोले सबैको सराहनीय रहेको बताइन् ।
ट्रान्सपरेन्सी इन्टरनेशनल चितवनका अध्यक्ष भीमबहादुर श्रेष्ठले भ्रष्ट आचरणका कारण घर–घरमा हिंसा भड्केकाले घरका सदस्यहरुको आचरणमा सुधार ल्याउनुपर्ने भन्दै माइती नेपाल चितवनको काम साह्रै प्रशंसनीय रहेको बताए ।
माइती नेपाल चितवनका प्रमुख ईश्वर गिरीले माइती नेपाल चितवनले बालबालिका तथा महिलामाथिको हिंसा नियन्त्रणका क्रममा यौन शोषण, बलात्कार, मानव बेचबिखन विरुद्ध न्यायका पक्षमा अभियोजन, सीपमूलक तालिम, समाजमा पुनस्र्थापना लगायतका काम गर्दै आइरहेको बताए । बाल यौन हिंसाका घट्नाहरु घट्दै जानुपर्नेमा बढ्दै जानुले सामाजिक सद्भाव र सदाचारलाई चुनौती दिएको भन्दै उनले मानव बेचबिखन र बालयौन शोषणका घट्नाहरुको विपक्षमा र प्रभावितहरुको न्यायको पक्षमा जुनसुकै उपाय अपनाउन तयार रहेको बताएका छन् ।
‘फ्रि अ गर्ल’ परियाजना सुरु भएदेखि हालसम्ममा तीनजना बालिकाहरु माइती नेपालको केन्द्रीय कार्यालयमा रहेको टेरेजा एकेडेमीमा अध्ययनका लागि पठाइएको, त्यसमा खैरहनीमा श्रीमानबाट हत्या गरिएकी गीता माझीका छोरीहरु पनि रहेको उनले बताए भने एकजना बालिकालाई एस.ओ.एस. बालग्राम चितवनमा भर्ना गरिएको जानकारी गराए ।
सो अवधिमा ४०० जनाको बचावट, २४ जनाको उद्घार, २३३५ जनालाई सुरक्षित आप्रवासन र वैदेशिक रोजगारी सम्बन्धी सूचना प्रदान, हराएका महिला बालबालिकाको ४३ वटा निवेदन दर्ता भएकोमा १२ जना फेला परेको र एकजना भारतबाट उद्घार गरी नेपाल फिर्ता गरिएको गिरीले बताए । हाल उद्योग संघ चितवनको सहयोगमा ६ जना महिलाहरुलाई ब्युटिशियन तालिममा सहभागिताका लागि पहल भएको छ भने मावन बेचबिखन तथा बालयौन शोषण विरुद्घ २५५ जनालाई अभिमुखीकरण तालिम दिइएको पनि माइती नेपाल चितवनका कार्यक्रम संयोजक गिरीले जानकारी दिए ।