प्रदेश नं १ का मुख्यमन्त्री भीम आचार्यले राजीनामा दिएका छन् । आज प्रदेशसभामा विश्वासको मत लिने प्रस्तावमाथि मतदान हुनुअघि आचार्यले राजीनामा घोषणा गरेका हुन् । गत १० भदौमा मुख्यमन्त्री बनेका आचार्य मुख्यमन्त्री बनेको ६९ दिनमा राजीनामा गर्दै बाहिरिएका हुन ।
विश्वासको मत लिने प्रयोजनका लागि बोलाइएको बैठकमा आफ्नो पक्षमा अंकगणीत नपुग्ने भन्दै आचार्यले राजीनामा दिने घोषणा गरे । त्यस्तै आज नै प्रदेश प्रमुखलाई राजीनामा दिएको पत्र बुझाउन जाने समेत जानकारी गराएका छन् ।
केन्द्रमा एमालेको किचलो बढेपछि तत्कालिन मुख्यमन्त्री शेरधन राईले राजीनामा दिएसँगै गत भदौ १० गते आचार्य मुख्यमन्त्रीमा नियुक्त भएका थिए ।
मुख्यमन्त्रीमा नियुक्त भएको १ महिनामा विश्वासको मत लिनुपर्ने कानुनी व्यवस्था रहेको छ । जसअनुसार आजका लागि विश्वासको मत लिने कार्यसूचीसहित बैठक बोलाइएको थियो । तर आफ्नो पक्षमा बहुमत नपुग्ने भन्दै प्रक्रियामा नगइ मार्ग प्रशस्त गर्ने घोषणा गरेका हुन् ।
यस अघि बाग्मती प्रदेशको मुख्यमन्त्री अष्टलक्ष्मी शाक्यले मु्ख्यमन्त्री पदबाट राजीनामा दिइसकेकी छिन । एमाले विभाजन हुँदा लुम्बिनी प्रदेशका मुख्यमन्त्री शंकर पोखरेलको मुख्यमन्त्री पद गएको थियो । यस्तै गण्डकी प्रदेशका मुख्यमन्त्री पृथ्वीसुब्बा गुरुङले मुख्यमन्त्री पद गुमाएका थिए ।
०७४ सालको निर्वाचनमा सबै भन्दा ठूलो दलको हिसाबले केन्द्रदेखि प्रदेशसम्मको सरकारमा वर्चश्व बनाएको एमाले पार्टी अन्तत प्रमुख प्रतिपक्षीमा सीमित हुन पुगेको छ ।