दश दिनलाई नेकपाको युध्दविराम,प्रचण्डको ‘काउन्टर’ मा ओलीको अर्को प्रस्ताव आउने
प्रधानमन्त्री एवम् नेकपा अध्यक्ष केपी शर्मा ओलीले अर्का अध्यक्ष पुष्पकमल दाहाल ‘प्रचण्ड’ले पेस गरेको राजनीतिक प्रतिवेदनको जवाफ दिन समय मागेका छन्। बुधबार बसेको नेकपाको सचिवालय सचिवालय बैठकमा प्रधानमन्त्री ओलीले प्रचण्डको प्रतिवेदनको जवाफ दिन समय मागेपछि बैठक १० दिनका लागि स्थगित भएको हो। गत कात्तिक २८ गते बसेको सचिवालय बैठकमा प्रचण्डले राजनीतिक प्रतिवेदन पेस गरेका थिए। सो प्रतिवेदन एकतर्फी रूपमा आएको र उक्त प्रतिवेदनले पार्टी एकतालाई नै गम्भीर संकटमा पारेको भन्दै प्रधानमन्त्री पक्षधर नेताहरूले प्रतिवेदन फिर्ता लिनु पर्ने बताएका थिए।
प्रचण्डको सो प्रतिवेदनलाई ‘काउन्टर’ मा ओलीको अर्को प्रतिवेदन पेश गर्नका लागि दश दिनको समय माग गरेका छन् । यो सँगै दश दिनपछि फेरि बस्नेगरी आजको नेकपा सचिवालय बैठक सकिएको छ । नेकपाको बैठक सवा एक बजेबाट शुरु भई पौने तीन बजेसम्म बसेको हो ।
प्रधानमन्त्री केपी शर्मा ओलीले पनि सचिवालयमा राजनीतिक प्रतिवेदन पेश गरेपश्चात् सबैउपर छलफल गर्ने गरी अर्को बैठक मंसिर १३ गते बस्ने छ । आजको बैठकले स्थायी समिति बैठक १८ गते बस्ने र १५ गते बस्ने भनिएको केन्द्रीय समितिको बैठक मंसिर २५ गतेसम्मलाई सार्ने निर्णय गरेको छ ।
