बरिष्ठ सह सचिव डा दामोदर रेग्मी सचिव बढूवामा सिफारिस भएका छन् । सचिव बढुवा सिफारिस समितिको सोमबार बसेको बैठकले प्रशासन सेवातर्फको रिक्त रहेको एक सचिव पदमा बरिष्ठ सह सचिव डा दामोदर रेग्मीलाई सचिव बढुवाका लागि सिफारिस गरेको हो ।

Advertisement 1

रेग्मीको नाम गत चैत्रमै सचिव बढुवाका लागि सिफारिस भएको थियो । यो बीचका तीन महिना सचिव बढुवाका लागि सिफारिस गर्ने लोकसेवा पदाधिकारीविहिन हुँदा बढूवाका मुखमा रहेका बरिष्ठ सहसचिव मारमा पर्दै आएका थिए । तीन महिना पछि लोकसेवा आयोगका पदाधिकारीहरु नियुक्त भएसँगै बढुवा प्रक्रिया अघि बढेको छ ।

Advertisement 2

रेग्मी अहिले स्वास्थ्य तथा जनसंख्या मन्त्रालयका कर्मचारी प्रशासन महाशाखा प्रमुखका रुपमा कार्यरत छन् । लोकसेवा आयोगका अध्यक्षको अध्यक्षतामा रहेको सचिव बढुवा सिफारिस समितिको सोमबार बसेको बैठकले सहसचिव रेग्मीलाई सचिव बढुवाका लागि सरकारसमक्ष सिफारिस गर्ने निर्णय गरेको हो । रेग्मीलाई निजामती सेवा ऐनअनुसार कुल पदको २० प्रतिशत ज्येष्ठताका आधारमा बढुवा गर्ने प्रावधानअनुसार स्वतः सचिवमा बढुवा गर्नेगरी सिफारिस गरिएको हो ।अब बस्ने मन्त्रिपरिषद् बैठकले रेग्मीलाई सचिवमा वढुवा गर्ने छ ।

विभिन्न मन्त्रालय, निकाय र प्रदेशमा लामो समयदेखि विभिन्न सेवा समूहका गरी १० सचिव पद रिक्त रहँदै आएको छ । यसअघि समयमा नै पदपूर्ति नहुँदा सचिव बढुवाको मुखमै रहेका वरिष्ठ सहसचिवहरुलाई मर्का परेको थियो ।