काठमाडौं। राष्ट्रिय स्वतन्त्र पार्टी (रास्वपा) का सांसद विश्वराज पोखरेलले गृहजिल्लाका एक प्रधानाध्यापकमाथि गरेको व्यवहारप्रति नेपाल शिक्षक महासंघले गम्भिर आपत्ति जनाउँदै विज्ञप्ति जारी गरेको छ। महासंघले शनिबार विज्ञप्ति जारी गर्दै उक्त घटनाले शैक्षिक क्षेत्रको मर्यादा र स्वायत्ततामाथि आच पुगेको ठम्याएको छ।

Advertisement 1

महासंघका अध्यक्ष लक्ष्मीकिशोर सुवेदी र महासचिव तुलाबहादुर थापाद्वारा हस्ताक्षरित विज्ञप्तिमा २०८३ वैशाख १० गते ओखलढुंगाको सिजिदेम्बा–२ स्थित श्री चण्डेश्वरी माध्यमिक विद्यालयमा भएको घटनाप्रति ध्यानाकर्षण भएको उल्लेख गरिएको छ। विज्ञप्तिअनुसार सांसद पोखरेलले विद्यालय हाताभित्र प्रवेश गरी प्रधानाध्यापक सन्तबहादुर मगरमाथि धम्कीपूर्ण र अपमानजनक व्यवहार प्रदर्शन गरेका थिए।

विज्ञप्तिमा भनिएको छ, “हरेक पदाधिकारीको आफ्नै जिम्मेवारी र क्षेत्राधिकार हुन्छ। यस तथ्यलाई बेवास्ता गर्दै गरिएको यस्तो अशोभनीय व्यवहारले शैक्षिक क्षेत्रको गरिमा र स्वतन्त्रतामाथि गम्भीर प्रहार गरेको छ।” महासंघले उक्त व्यवहारबाट जननिर्वाचित प्रतिनिधिको मर्यादा र विश्वाससमेत कमजोर भएको टिप्पणी गरेको छ।

Advertisement 2

महासंघले शिक्षा क्षेत्रलाई राजनीतिक दबाबमुक्त राख्नुपर्ने आवश्यकता औंल्याउँदै विद्यालयजस्तो संवेदनशील स्थलमा गरिने व्यवहार मर्यादित र जिम्मेवार हुनुपर्नेमा जोड दिएको छ। साथै, यस्ता गतिविधि दोहोरिन नदिन सम्बन्धित सबै पक्षलाई सचेत रहन आग्रह गरिएको छ।