चितवनमा दुर्घटनामा वृद्धि: गत साउनदेखि कात्तिकसम्म २९ जनाले ज्यान गुमाए
चितवन। गत ४ महिनामा जिल्लामा भएका सवारी दुर्घटनामा २९ जनाले ज्यान गुमाएका छन्। यसमध्ये २१ पुरुष ६ जना महिला र बालबालिका २ जना रहेका छन्।
Advertisement 1
जिल्ला ट्राफिक प्रहरी कार्यालयका प्रमुख प्रहरी निरीक्षक अनिल थापाका अनुसार चालु आर्थिक वर्षको साउनदेखि कात्तिक मसान्तसम्ममा भएका २ सय २४ दुर्घटनामा उनीहरूको ज्यान गएको हो। यस्तै ती दुर्घटनामा परी ४ सय ५६ जना घाइते भएका छन्। यसरी दुर्घटनामा पर्नेमा सबैभन्दा बढी दुईपाङ्ग्रे सवारीसाधन छन्।
उनका अनुसार ४ महिनामा भएको सवारी दुर्घटनामा ३ सय ३३ वटा सवारीसाधन परेका छन्। तीमध्ये २ सय १ मोटरसाइकल छन्। यस्तै जिप, कार ३४, शारीरिक शक्तिले चल्ने ३० , ट्रक, ट्याङ्कर २४, बस १५, टेम्पो १४ रहेका छन्। यस्तै टिपर २, माइक्रोबस ५, ट्याक्टर ४ र अन्य सवारीसाधन ४ छन्।
Advertisement 2
गत आवको सोही अवधिमा २ सय ५ वटा सवारी दुर्घटना भएको थियो। गत वर्षको तुलनामा यस वर्ष दुर्घटना धेरै भए पनि मानवीय क्षति भने कम भएको छ। गत वर्ष सोही अवधिमा भएका दुर्घटनामा ४६ जनाको मृत्यु भएको थियो भने ४ सय १४ जना घाइते भएका थिए।
दुर्घटना न्यूनीकरणका लागि जिल्लामा छड्के जाँच, जनचेतना जगाउने कार्यक्रम गरिरहेको थापाले बताए। फराकिला सडकमा तीव्रगतिमा सवारी चलाउँदा र मादक पदार्थ सेवन गरेर सवारी चालउँदा अहिले दुर्घटना बढेको उनले बताए। सडकअनुसार सवारी चाप बढी हुनु र ट्राफिक नियमको पालना नगर्नुले पनि दुर्घटना बढेको उनले जानकारी दिए।
