काठमाडौ । नेपाल राष्ट्र बैंकका एक उच्च तहका महिला कर्मचारीलाई दुर्व्यवहार गरेका नेपाल राष्ट्र बैंक टक्सार महाशाखाका प्रमुख थानेश्वर आचार्यलाई बर्खास्त भएका छन् । गभर्नर महाप्रसाद अधिकारीले उनलाई सोमबार बर्खास्त गर्ने निर्णय गरेको नेपाल राष्ट्र मानव संशाधन विभाग प्रमुख मुकुन्दकुमार क्षेत्रीले जानकारी दिए । उनका अनुसार आचार्यलाई भविष्यमा बैंकको सेवामा अयोग्य नठहरिने गरी राष्ट्र बैंकको सेवाबाट हटाउने निर्णय भएको हो ।

Advertisement 1

राष्ट्र बैंकको ‘कर्मचारी सेवा विनियमावली’को विनियम १४५ र १४८ ले कारवाही सम्बन्धी व्यवस्था गरेको छ । विनियम १४८ मा कर्मचारीको अयोग्यताका कारण जिम्मेवारी पुरा गर्न नसकेको, आचरण सम्बन्धि कुरा पटक–पटक उल्लंघन गरेको, कार्यालय समयमा पटक–पटक मादक वा लागू पदार्थ सेवन गरी आएको, पटक–पटक अनुशासनहिन काम गरेको व्यक्तिलाई सेवाबाट हटाउने व्यवस्था उल्लेख छ । यस्तै बैंकको गोपनीयता भंग गरेमा, राजनीतिमा भाग लिएमा, पदीय जिम्मेवारीको बेवास्ता गरेमा र लगातार ३० दिन वा वर्षभरीमा ९० दिनसम्म गयल भएमा पनि यस्तै प्रकारको कारबाही गर्ने व्यवस्था विनियमावलीमा उल्लेख छ ।

गत पुस २६ गते आचार्यले नगरकोटको एक होटेलमा राष्ट्र बैंकले नै आयोजना गरेको कार्यक्रममा मदिरा सेवन गरी एक उच्च महिला अधिकृतमाथि अभद्र व्यवहार गरेका थिए । उक्त घटनाबारे अध्ययन गरेर कारबाही अघि बढाउन ति महिला अधिकृतले नेपाल राष्ट्र बैठको मानव संशाधन विभागमा उजुरी दिएपछि आचार्यलाई जिम्मेवारी बिहिन बनाएर स्पष्टिकरण सोधिएको थियो । घटनालाई आन्तरिक रूपमा मिलाउन खोजिए पनि प्रहरीले पछि छानबिन गरेको थियो ।