नेपाल दूरसंचार प्राधिकरणका लागि टेरामक्स प्रविधि खरिद प्रकरणमा मुछिएका स्वास्थ्यमन्त्री मोहन बस्नेतले बयान दिएका छन् ।

Advertisement 1

मंगलबार अपराह्न अख्तियार कार्यालय टंगाल पुगेर उनले बयान दिएका हुन् । यसभन्दा अघि पटक पटक अख्तियारले बस्नेतलाई बयानका लागि बोलाए पनि उनीले टेरेनन् । स्रोतका अनुसार शक्तिकेन्द्रबाट अख्तियारलाई दबाव दिइरहेका छन् ।

पूर्व सञ्चारमन्त्री ज्ञानेन्द्रबहादुर कार्कीले बयान दिएको केही दिनमा उनी पनि पुगेर बयान दिएका हुन्। उनीहरूले बयान दिएपछि अख्तियारले टेरामक्स प्रकरणमा मुद्दा दायर गर्ने अन्तिम तयारी गरेको छ। ‘दुवै नेताले अख्तियारमा लिखित बयान दिएका छन्,’ स्रोतले भन्यो।

Advertisement 2

गैरकानुनी सम्पत्ति आर्जनको आरोपमा अख्तियारले हालै नेपाल टेलिकमका निलम्बित प्रबन्ध निर्देशक सनिल पौडेल र सुरक्षण मुद्रण केन्द्रका कार्यकारी निर्देशक विकल पौडेललाई पक्राउ गरेको थियो । यस प्रकरणमा मुछिएका तत्कालीन सचिव एवं हाल राष्ट्रिय सूचना आयोगका प्रमुख आयुक्त महेन्द्रमान गुरुङले पनि अख्तियार पुगेर बयान दिइसकेका छन्।

दूरसञ्चार प्राधिकरणका तत्कालीन अध्यक्ष दिगम्बर झा, निवर्तमान अध्यक्ष पुरुषोत्तम खनाल र संघीय मामिला मन्त्रालयका सचिव विनोद सिंहले पनि अख्तियारमा पुगेर बयान दिइसकेका छन्। उनीहरू सबैले बयान दिँदा पनि राजनीतिक तहबाट मन्त्रालयको नेतृत्व गरेका व्यक्तिले संवैधानिक आयोगलाई अटेर गरेका थिए। उनीहरू अहिले बाध्य भएर अख्तियार पुगेका हुन्।