रौतहटको चन्द्रपुर नगरपालिकाका तत्कालीन प्रमुख रामचन्द्र चौधरी,तत्कालीन प्रमुख प्रशासकीय अधिकृत,लेखाका प्रमुखसहित चार जनाविरुद्व भ्रष्टाचार मुद्दा दायर भएको छ ।

Advertisement 1

चन्द्रपुर नगरपालिकाका तत्कालीन नगरप्रमुख चौधरीसहितका  प्रमुख प्रशासकीय अधिकृत कृष्ण प्रसाद सिग्देल, लेखा अधिकृत (राजस्व शाखा प्रमुख) किर्तिराज सुवेदी, आंशिक कन्स्ट्र्क्सनका सञ्चालक राम विनोद राउत बरैलाई ५५ लाख २ हजार २९८ रुपैयाँ र तत्कालीन नगर प्रमुख रामचन्द्र चौधरीलाई ३७ लाख ३४ हजार २९८ रुपैयाँ बराबर बिगो कायम गरी बिहीबार विशेष अदालत काठमाडौंमा मुद्दा दायर गरेको हो । आरोपीहरुले आशिक कन्स्ट्रक्सनसँगको मिलेमतोमा अनियमित ढंगले चाँदी नदीबाट नदीजन्य पदार्थ उत्खनन गरी राजस्व छली गरेको ठहर गर्दै ५५ लाख दुई हजार १९८ रुपियाँ भ्रष्टाचार गरेको आरोपपत्रसहित अख्तियार विशेषमा पुगेको हो ।

चाँदी नदीको नदीजन्य पदार्थ विक्री सम्बन्धी सम्झौता गर्दा तोकिएको नगद तथा बैंक जमानत पेश नगरी मूल्य अभिबृद्धि कर (भ्याट)समेत दाखिला नगरी सत्र लाख अठ्सठ्ठी हजार रुपैयाँ बराबरको घटी राजस्व रकम असुल गरेर भ्रष्टाचार गरेको अख्तियारको आरोप पत्रमा उल्लेख छ ।

Advertisement 2

उनीहरुविरुद्व आर्थिक वर्ष २०७७-०७८ मा ठेक्का नं. १८-०७७-०७८, चाँदी नदीको राजमार्ग दक्षिण नदीजन्य पदार्थ बिक्री–राजपैडादेखि नयाँ बस्ती मोतिपुरसम्मको ठेक्कामा आंशिक कन्स्ट्रक्सन रौतहटसँग सम्झौता गर्दा तोकिएको नगद तथा बैंक जमानत पेश नगरी १५ लाख ६८ हजार रुपियाँ बराबरको कम राजस्व रकम असुल गरेको आरोप पनि लागेको आयोगले जनाएको छ ।

यसैगरी, ठेक्का नं. १९-०७७-०७८ मा भएको सम्झौता बमोजिमको तोकिएको नगद तथा बैंक जमानत पेश नगरी नलिइ मूल्य अभिवृद्वि करसमेत दाखिला नगरी १७ लाख ६८ हजार रुपियाँ र प्रावधान विपरीत नदीजन्य पदार्थ अवैध रुपमा उत्खनन् गरी ३७ लाख ३४ हजार १९८ रुपियाँ गरी जम्मा ५५ लाख दुई हजार १९८ रुपियाँ भ्रष्टाचार भएको आयोगको विज्ञप्तिमा उल्लेख छ ।

आरोपीहरुले मापदण्ड विपरित अवैध रुपमा ३७ लाख ३४ हजार रकम बराबरको नदीजन्य पदार्थ उत्खनन गरी नगरपालिकालाई उक्त रकम बराबर राजस्वमा हानी पुर्याई ५५ लाख २ हजार बराबरको राजस्व चुहावट गरेको अख्तियारले दाबी गरेको छ ।