सशस्त्र प्रहरी बल झापाले भारतबाट भन्सार छलेर नेपाल भित्राइएको ११ कार्टुन स्पोर्टस जुत्ता, चप्पल र बिडी बरामद गरेको छ। सशस्त्र प्रहरी बल नेपाल नम्बर २ गण झापाले विभिन्न ब्राण्डका २५४ जोर जुत्ता, २४५ जोर चप्पल र ४ बोरा भारतीय कम्पनीका सुर्तीजन्य पदार्थ बिडी बरामद गरेको हो।

Advertisement 1

टाघनडुब्बाका इन्स्पेक्टर दीपेन्द्रमणि राईको कमान्डमा खटिएको टोलीले आइतबार राति ९ बजेको समयमा झापा गाउँपालिका ४ स्थित सुकुम्वासी बस्ती नजिकैको सीमा इलाकाको सन्थालबस्तीबाट जुत्ता चप्पल बरामद गरेको हो। सशस्त्र प्रहरीको गस्ती टोलीलाई देख्नसाथ तस्करहरू सामान छाडेर भागेका थिए। बरामद गरिएको जुत्ता र चप्पललाई ४ लाख ४ हजार मूल्य तोकेर मेची भन्सार कार्यालय काँकडभिट्टा बुझाउने तयारी भइरहेको छ।

त्यस्तै सशस्त्र प्रहरी नायव निरीक्षक युवराज खतिवडाको टोलीले सोमबार बिहान ६ बजे काँकडभिट्टाबाट धुलाबारी तर्फ जाँदै गरेको प्रदेश १-०१-००१ ह ९००४ नम्बरको अटो चेकजाँच गर्दा ४ बोरा भारतीय कम्पनीका सुर्तीजन्य पदार्थ बिडी बरामद गरेको छ।

Advertisement 2

त्यसैगरी सोमबार बिहान ६ बजे २० मिनेटको समयमा सशस्त्र प्रहरी बल नेपाल नम्बर २ गण झापाबाट खटिएका इन्स्पेक्टर भीष्म सापकोटाको सशस्त्र प्रहरी टोलीले काँकडभिट्टाबाट धुलाबारीतर्फ जाँदै गरेको प्रदेश १-०१-००१ ह ८७४४ नम्बरको अटोबाट पनि ४ बोरा बिडी बरामद गरेको छ।

बरामद गरिएको ८ बोरा बिडी दुई लाख रुपैयाँ मूल्य तोकेर मेची भन्सार कार्यालय काँकडभिट्टा बुझाउने तयारी भइरहेको सशस्त्र प्रहरीले जनाएको छ।