वैज्ञानिक तबरले निजामती कर्मचारीहरुको तलब सुविधा पुनरावलोकन एवं समायोजनको माग गर्दै नेपाल निजामती कर्मचारी युनियनले उच्चस्तरीय तलब सुविधा पुनरावलोकन आयोगमा राय सुझाव सहितको प्रतिवेदन बुझाएको छ ।

Advertisement 1

तलब निर्धारणका आधारभूत सिद्धान्त, विश्वव्यापी मूल्यमान्यता, न्यून तलब हुँदा पर्ने नकारात्मक प्रभाव, विगतमा गठन भएका तलब आयोगहरुका प्रतिवेदनको विश्लेषण गर्दै तलब तथा सुविधाको पुनरावलोकनका लागि विभिन्न सुझाव समावेश गरी तयार गरिएको प्रतिवेदन अध्यक्ष गोपाल प्रसाद पोख्रेलको नेतृत्वमा गएको कर्मचारी युनियनको टोलिले आयोगका संयोजक लिलामणी पौडेललाई हस्तान्तरण गरेको हो ।

तलब सुविधा पुनरावलोकनका लागि मात्र नभई राजश्व वृद्धि र सरकारको शिरोभार खर्च घटाउने उपायहरु पनि सुझाव प्रतिवेदनमा समावेश गरिएको कर्मचारी युनियनका सचिव प्रकाश भट्टराईले बताए । उनले भने “समान आयस्तर भएका विश्वका अन्य देश र सार्क मुलुकहरु मध्ये नेपालमा सबैभन्दा न्यून सेवा सुविधामा कर्मचारीहरु काम गरिरहेका छन् । कर्मचारीहरुको मनोवल अभिवृद्धि गरी सार्वजनिक सेवा प्रवाहलाई सुधार गरी सुशासन कायम गर्नका लागि सरकारले कर्मचारीको श्रमको उचित मूल्य कायम गरी उत्प्रेरणा प्रदान गर्न न्यायोचित पारिश्रमिक प्रदान गर्नुपर्दछ । बढ्दो महङ्गी, बदलिँदो आर्थिक सामाजिक परिवेशका आधारमा कर्मचारीहरुको तलब सुविधा परिमार्जन हुन आवश्यक छ । यसका लागि हामीले सुझाव प्रतिवेदनमा समस्या मात्र होइन, समाधानका उपायहरु पनि सुझाएका छौँ ।”

Advertisement 2

तलब सुविधा पुनरावलोकनका सम्बन्धमा सुझाव प्रतिवेदन तयार गर्ने सन्दर्भमा कर्मचारी युनियनले आफ्ना प्रदेश कार्यसममिति तथा जिल्लारविभागीय कार्यसमिति मार्फत देशभरबाट सुझाव संकलन गरेको सचिव प्रकाश भट्टराईले जनाए ।