सरकारले देशभरका कर्मचारीहरुलाई आफ्नो सम्पत्ति विवरण बुझाउन आग्रह गरेको छ । संघीय मामिला तथा सामान्य प्रशासन मन्त्रालय मातहतको निजामती किताबखानाले देशभरका कर्मचारीहरुलाई आफ्नो सम्पत्ति विवरण साउन १ गतेदेखि भाद्र २९ गतेसम्म राष्ट्रिय किताब खाना (निजामती) मा प्राप्‍त हुने गरी पठाउन राष्ट्रिय निजामती किताबखानाद्धारा जारी सूचनामा निर्देशन दिएको छ ।
जसअनुसार,कर्मचारी समायोजन ऐन ०७५ बमोजिम प्रदेश तथा स्थानीय तहमा समायोजन भएका अन्य सेवाका कर्मचारीहरुले कर्मचारी संकेत नम्बर प्राप्त नभएको र लोकसेवा आयोगबाट ०७५/ ७६ र सोभन्दा पछिको विज्ञापन अनुसार सिफारिस भइ स्थानीय तहमा नियुक्त भएका र कर्मचारी संकेत नम्बर प्राप्त गरेका कर्मचारीको हकमा तत् तत् निकायमा सम्पत्ति विवरण बुझाउन भनिएको छ ।
यस्तै,जिसस,गाउँ पालिका,नगरपालिका,प्रदेश सरकारका मन्त्रालयलाई बुझाइएको सम्पत्ति विवरणको अभिलेख तत् तत् निकायमा राखी सम्पत्ति विवरणको बन्दी खाम ३० दिनभित्र मुख्यमन्त्री तथा मन्त्रिपरिषद्को कार्यालयमा पेश गर्न निर्देशन दिइएको छ । अध्ययन,असाधरण बिदा,अन्य बिदा,तालिम,काज वा निलम्बनमा परेका कर्मचारीले समेत सम्पत्ति विवरण ६० दिनभित्र पेश गर्नुपर्नेछ ।

Advertisement 1

उता शिक्षकहरुलाई समेत ६० दिनभित्रमा सम्पत्ति विवरण पेश गर्ने निर्देशन दिइएको छ । स्थायी शिक्षकहरूले आर्थिक वर्ष २०७७/०७८ को सम्पत्ति विवरण विद्यालय, स्थानीय तहले संकलन गरी जिल्ला शिक्षा विकास तथा समन्वय इकाईहरूमा बुझाउनुपर्ने छ । इकाईहरूले जिल्लाका सबै शिक्षकहरूको विवरण भदौ २९ सम्ममा पठाइ सक्नुपर्ने छ ।
यस्का अलवा विद्यालयमा कार्यरत करार, राहत, बाल विकास शिक्षक, विद्यालय कर्मचारी आदिले आफू कार्यरत स्थानीय तहमा विवरण बुझाउनुपर्ने छ । स्थानीय तहले सो विवरण सुरक्षितसाथ राख्‍नुपर्ने छ । सम्पत्ति विवरण बुझाउने दिन सार्वजनिक विदा परेमा उक्त दिन किताबखाना खुला रहने छ ।