बलिउड अभिनेत्री कंगना रनौटविरुद्ध देशद्रोहको मुद्दा दर्ता भएको छ । विवादको पर्यायवाचीका रूपमा परिचित उनी कहिले कलाकारिता क्षेत्रसँगै जोडिएको विवादमा आउँछिन् त कहिले राजनीतिक विषयमा टिप्पणी गरेका कारण चर्चामा आइरहन्छिन् । यसैबीच अभिनेत्री कंगनाले मोदी सरकारले कृषि कानुन फिर्ता लिएको विषयमा गरेको प्रतिक्रियाका कारण फेरि विवादमा आएकी छन् । उनको विवादले कंगनाविरुद्ध ‘देशद्रोह’को मुद्दासमेत दर्ता भएको छ ।

Advertisement 1

मोदी सरकारले हालै फिर्ता लिएको कृषि कानुनको विषयलाई लिएर अभिनेत्री कंगनाले असन्तुष्टि जनाएकी थिइन् । उनले पूर्वप्रधानमन्त्री इन्दिरा गान्धीको तारिफ गर्दै किसानलाई ‘खालिस्तानी आतंकवादी’ को संज्ञा दिएकी थिइन् । उनको यो बयानलाई लिएर भारतको युवा कांग्रेसका सचिव अमरिश रंगन र कानुनी विभागका संयोजक अन्बुज दीक्षितले उनीविरुद्ध दिल्लीमा उजुरी दिएका छन् ।
अभिनेत्री कंगनाले शुक्रबार आफ्नो सामाजिक सञ्जालमा कृषि कानुन फिर्ता भएको सन्दर्भमाथि टिप्पणी गरेकी थिइन् । उनले सञ्जालमा लेखेकी थिइन्, ‘खालिस्तानी आतंकवादीले सायद आज सरकारको हात मोडिरहेको छ । तर, भारतकी एक मात्र प्रधानमन्त्रीलाई नभुल्नु, जसले यिनीहरूलाई आफ्नो जुत्तामुनि किचेकी थिइन् । उनले यो देशको लागि कति धेरै कुरा सहेकी छन् भन्ने थाहा छैन । उनले आफ्नो जिन्दगीको बदलामा कति मच्छडहरूलाई किचेकी छन्, तर देशलाई टुट्न दिइनन् । उनको मृत्युको दशकौपछि पनि आज उनको नामले यिनीहरू काँप्छन् । यिनीहरूलाई त्यस्तै गुरु चाहिन्छ ।’