बागमती प्रदेशका मुख्यमन्त्री अष्टलक्ष्मी शाक्य (बोहोरा) र सामाजिक विकास मन्त्री विजय सुवेदीले आज (मंगलबार) भरतपुर, बागीश्वरीस्थित योगी नरहरिनाथ योग तथा प्राकृतिक चिकित्सालयको निरीक्षण गरेका छन् । बागीश्वरी आध्यात्मिक परिषद्, योगी नरहरिनाथ आश्रमद्वारा सञ्चालित चिकित्सालयका मेडिकल डाइरेक्टर डा. हेमराज कोइराला र आश्रमका अध्यक्ष शैलेन्द्र पियाले अस्पतालको हुँदै गरेको विकास एवम् थप विकासको उद्देश्य र आवश्यकताबारे मन्त्रीद्वयलाई जानकारी गराएका थिए ।

Advertisement 1

यस प्राकृतिक चिकित्सालयलाई प्रदेश अस्पतालको रुपमा विकास गर्ने योजना रहेको अध्यक्ष पिया बताउँछन् । प्रदेशस्तरीय प्राकृतिक चिकित्सालय बनाउन आवश्यक सहयोगका लागि मन्त्रीद्वयलाई अनुरोध गरेको उनले बताए ।

चिकित्सालयलाई अहिलेसम्म प्रदेश सरकारबाट दुई करोड रुपैयाँ आर्थिक सहयोग प्राप्त भएको मेडिकल डाइरेक्टर कोइरालाले जानकारी दिए । अस्पताललाई कोलोन हाइड्रोथेरापी मेसिन, एक्सरे मेसिन, ल्याब स्थापनाका लागि आवश्यक उपकरणहरु तत्काल चाहिएको बताइएको छ ।

Advertisement 2

मन्त्रीद्वयले अस्पताल भवन, आवास लगायत गौशाला, बागीश्वरी मन्दिर र मन्दिरका भग्नावशेषहरुको पनि निरीक्षण गरेका थिए । बागीश्वरीलाई धार्मिक पर्यटकीय क्षेत्रको रुपमा विकास गर्ने समेत आफूहरुको योजना रहेको अध्यक्ष पियाले बताए ।