महोत्तरीको भङ्गाहा नगरपालिका–८ धर्मपुरमा हराइरहेका सात बालिका किशोरी अपहरणमा परेको हुनसक्ने आशङ्का गरिएको छ। मङ्गलबार दिउँसो घाँस काट्न गएका १० देखि १८ वर्षसम्मका सात बालिका र किशोरी अपहरणमा परेको हुनसक्ने अनुमान गरिएको हो।

Advertisement 1

धर्मपुरको दलित बस्तीका घाँस काट्न भनी समूहमा निस्केका १० वर्षीयाद्वय रञ्जना पासवान र सीमा पासवान, १३ वर्षीया ज्योति पासवान, १५ वर्षीयाद्वय रिया पासवान र रचना पासवान एवं १८ वर्षीयाद्वय नगिना पासवान र अस्मिता पासवान सम्पर्कविहीन छन्। सम्पर्कविहीन सातै जनाको खोजी नेपाल प्रहरी, सशस्त्र प्रहरी र आफन्तले गरिरहेका छन्।भंगहा नगरपालिकाका मेयर संजिव कुमार साहले मंगलबार दिउँसो करिब १ बजे सँगै घाँस काट्न निस्केका ती किशोरी र बालिकाहरु राति १२ बजेसम्म घर नफर्केको जानकारी दिएका छन् । उनीहरू सबैजना एउटै टोलको रहेको मेयर साहले बताए ।

उनले सम्पर्कविहीन भएको घटना थाहा पाएलगतै प्रहरीसँग समन्वय गरि नगरपालिकाले खोजी गरिरहेको छ । सम्पर्कविहीन भएका किशोरी र बालिकाहरु घर नफर्किदा परिवारमा रुवाबासी सुरु भएको छ भने गाउँले त्रसित बनेका छन् ।

Advertisement 2

‘घरबाट करिब एक किलोमिटरको दूरीमा रहेको पूर्वपट्टीको धर्मपुरस्थित चौरमा उनीहरु घाँस काट्न गएका थिए,’ मेयर साहले भने, ‘उनीहरू सबैजना प्रायःजसो समूहमै घाँस काट्न चौरमा जान्थे र साँझसम्म आ आफ्नो घर फर्किहाल्थे, तर मंगलबार अबेर रातिसम्म घर नफर्केपछि घटना सार्वजनिक भएको हो ।’ उता महोत्तरीका प्रहरी उपरीक्षक दिनेश आचार्यले बालिकाहरुको खोजी गर्न प्रहरी टोली खटाइ सकिएको बताएका छन । नेपाल प्रहरी, सशस्त्र प्रहरी र गाउँका करिब डेढसय युवाहरु मिलेर मध्यरातसम्म उनीहरुको खोजी चारैतर्फ गरेका थिए तर फेला पर्न सकेन ।