इलाम र बझाङमा हुन लागेको उपनिर्वाचनमा ३२ जनाको उम्मेदवारी दर्ता
काठमाडौं । आगामी बैशाख १५ गतेका लागि तय भएको उपनिर्वाचन ३२ जनाको उम्मेदवारी दर्ता भएको छ । जसमा इलाम प्रतिनिधि सभा क्षेत्र नम्बर दुइका लागि २० जनाको र बझाङ प्रतिनिधि सभा क्षेत्र नम्बर एकको प्रदेश सभा क्षेत्र नम्बर एकका लागि १२ जनाको उम्मेदवारी दर्ता भएको निर्वाचन आयोगले जनाएको हो ।
Advertisement 1
दुबै क्षेत्रमा शनिबार शान्तिपूर्ण रूपमा मनोनयन दर्ता भएको निर्वाचन आयोगका सहायक प्रवक्तासमेत रहेका आयोगका उपसचिव रामदत्त पाण्डेयले जानकारी दिए । उनका अनुसार इलाम जिल्ला प्रतिनिधि सभा निर्वाचन क्षेत्र नम्बर दुईको उपनिर्वाचनका लागि १२ राजनीतिक दलबाट १२ जना र आठ जना स्वतन्त्र उम्मेदवार गरी जम्मा २० जनाको मनोनयनपत्र दर्ता भएको छ । मनोनयनपत्र दर्ता गर्ने २० जना सबै पुरूष रहेका आयोगले जनाएको छ । यस्तै बझाङ प्रदेश सभा निर्वाचन क्षेत्र नम्बर एकको प्रदेश सभा सदस्य उपनिर्वाचनका लागि १२ राजनीतिक दलबाट १२ जनाको मनोनयनपत्र दर्ता भएको छ । जसमध्ये ११ जना पुरूष र एक जना महिला रहेका छन् ।
शनिबार बिहान १० बजेदेखि साँझ पाँच बजेसम्म इलाम र बझाङ जिल्लाको मुख्य निर्वाचन अधिकृतको कार्यालयमा शान्तिपूर्ण रूपमा उम्मेदवारको मनोनयनपत्र दर्ता भएको आयोगले जनाएको छ । इलाम दुईको प्रतिनिधिसभा सदस्यका लागि उपनिर्वाचनमा नेकपा (एमाले)का सुहाङ नेम्वाङ, नेपाली कांग्रेसका डम्बर खड्का, राष्ट्रिय स्वतन्त्र पार्टीका मिलनकुमार योङहाङ लिम्बु, राष्ट्रिय प्रजातन्त्र पार्टीका लक्ष्मी गुरुङ, नेकपा (एकीकृत समाजवादी)का जीतबहादुर राई, जनमत पार्टीका प्रेमकुमार थाम्सुहाङ, नेपाल मजदुर किसान पार्टीका श्यामबहादुर दर्जी, नेपाली जनता दलका रेशमबहादुर सुनार, नेसनल मंगोल अर्गनाइजेशनका मनिबहादुर लिम्बु, राष्ट्रिय प्रजातन्त्र पार्टी नेपालका गणेशबहादुर चौहान र नेसनल रिपब्लिकका धनराज रानामगर रहेका छन् । त्यस्तै, स्वतन्त्र उम्मेदवारी दिनेमा अर्जुनबहादुर शाही, केशबकुमार चापागाईं, डकेन्द्रसिंह लिम्बु, डाकप्रसाद गौतम, दिपेश बोहोरा, मनोज निरौला, योगेन्द्र गुरुङ र राज बश्याल रहेका छन् ।
Advertisement 2
बझाङको प्रदेश सभा निर्वाचनमा कांग्रेसका अभिषेकबहादुर सिंह, एमालेका दमनबहादुर भण्डारी, माओवादी केन्द्रका जनकबहादुर बुढा, नेकपा एसका दिलबहादुर सिंह, जसपाका रामबहादुर जाग्री र जनमत पार्टीका सुशीलादेवी विष्ट, नेमकिपाका खगेन्द्रबहादुर शाही, नेपाली जनता दलका अशोक सुनार, नेसनल रिपब्लिकका किशोरकुमार खड्का, राष्ट्रिय मातृभूमिका गजेन्द्रबहादुर थापा, संघीय लोकतान्त्रिक राष्ट्रिय मंचका दिपकबहादुर खड्का रहेका छन् ।
उम्मेदवारको मनोनयनपत्र दर्ता भई सूची प्रकाशन भएपछि चैत २५ गते उम्मेदवारको विरोधमा उजुरी दिने समय निर्धारण गरिएको छ भने २६ गते मनोनयनपत्र र उजुरीमाथी जाँचबुझ गर्ने र २७ गते उम्मेदवारको नामावली प्रकाशन गर्नका लागि समय निर्धारण गरिएको छ ।
