इलाम-२ मा उपचुनावः कांग्रेस र सत्ता गठबन्धनको मतान्तर नौ हजार
काठमाडौं । इलाम २ मा एमालेबाट निर्वाचित सुवास नेम्वाङको निधनका लागि रिक्त प्रतिनिधिसभा सदस्यको उपनिर्वाचन वैशाख १५ गते हुँदैछ।
Advertisement 1
निर्वाचन आयोगले चैत २४ गते मनोनयन दर्ताको दिन तोकेको छ। केन्द्रमा एमाले माओवादी सत्ता गठबन्धनमा बनेसँगै समानुपातिक मतका आधारमा उपचुनावमा गठबन्धन नै अगाडि देखिन्छ।
गत वर्ष मंसिर ४ गते भएको चुनावमा इलाम–२ मा समानुपातिक तर्फ एमालेले २६ हजार पाँच सय ६२ मत पाएको थियो । माओवादी केन्द्रले पाँच हजार एक सय ५३ मत पाएको देखिन्छ।
Advertisement 2
त्यस्तै कांग्रेसले २२ हजार तीन सय ३३ मत पाउँदा राष्ट्रिय स्वतन्त्र पार्टीले चार हजार छ सय ६८ मत पायो। यस यदि माओवादी र एमालेबीच चुनाव तालमेल हुने हो भने प्रतिस्पर्धी कांग्रेसभन्दा समानुपातिक मत ९ हजारले बढी हुन आउँछ। जसपाले पनि साझा उम्मेदवारलाई समथर्न गरे मत अझ बढ्नेछ।
उक्त चुनावमा मङ्गोल नेशनल अर्गनाइजेशनले एक हजार छ सय ६१, राष्ट्रिय जनमुक्ति पार्टीले एक हजार चार सय १३, सङ्घीय लोकतान्त्रिक राष्ट्रिय मञ्चले एक हजार तीन सय २९, राष्ट्रिय प्रजातन्त्र पार्टीले एक हजार एक सय ९१ र जनता समाजवादी पार्टीले नौ सय छ मत पाएको थियो।
Advertisement 3
गत वर्षको चुनावमा प्रत्यक्षतर्फ माओवादी केन्द्रको समर्थनमा कांग्रेसका उम्मेदवार डम्बरबहादुर खड्का एमालेका उम्मेदवार नेम्वाङसँग जम्मा ११४ मतले पराजित भएका थिए।
नेम्वाङले ३० हजार २० मत ल्याउँदा खड्काले २९ हजार नौ सय छ मत पाएका थिए।
वैशाख १५ गतेको चुनावमा कांग्रेसले महासमिति सदस्य भेषराज आचार्य, पूर्वराज्यमन्त्री केशव थापा, जिल्ला सभापति डम्बरबहादुर खड्का, संविधानसभा सदस्य नगेन्द्र कुमाल, नेता रमेश लिङ्देन, पूर्व जिल्ला उपसभापति शान्तिकला तामाङ (राई) र महासमिति सदस्य चन्द्रमाया लिम्बूको नाम केन्द्रमा सिफारिस गरेको छ।
एमालेले पनि स्वर्गीय नेम्वाङपुत्र सुहाङ नेम्वाङसहित छ जनाको नाम केन्द्रमा पठाएको छ। एमालेले नेम्वाङसहित उपसचिव रवीन्द्र सुवेदी, जिल्ला सदस्य डा देवीक्षेत्री दुलाल, इलाम–२ क्षेत्रीय अध्यक्ष बुद्धिप्रसाद खनाल, नेता नरेन्द्रनाथ भट्टराई र पार्टी कोशी प्रदेश सदस्य रिपल राईको नाम सिफारिस गरी पठाइएको जिल्ला सचिव उमेश गुरुङले जानकारी दिए।
साना दल र स्वतन्त्र उम्मेदवारहरुले पनि इलाम २ को उपचुनाव लड्ने तयारी गरिरहेका छन्।
